اے پی سی سی نے آئندہ مالی سال کے معاشی اہداف منظور کرلیے، ترقی کا ہدف 4.2 فیصد

اسلام آباد: حکومت نے آئندہ مالی سال 2025-26 میں معاشی ترقی کی رفتار بڑھانے کا عزم ظاہر کرتے ہوئے 4.2 فیصد شرح نمو کا ہدف طے کر دیا ہے۔ یہ فیصلہ وفاقی وزیر احسن اقبال کی زیر صدارت سالانہ پلاننگ کوآرڈینیشن کمیٹی کے اجلاس میں کیا گیا۔

ترقیاتی منصوبوں کی مد میں وفاقی حکومت نے 1000 ارب روپے خرچ کرنے کی منظوری دی ہے، جب کہ چاروں صوبے بھی اربوں روپے کی لاگت سے اپنے ترقیاتی پروگرام شروع کریں گے۔

اجلاس میں بتایا گیا کہ تعلیم، صحت، توانائی، پانی اور انفراسٹرکچر جیسے اہم شعبوں پر سرمایہ کاری کی جائے گی، جبکہ بیرونی قرضوں کے ذریعے اضافی فنڈز کا بندوبست بھی کیا جائے گا۔

ماہرین کا کہنا ہے کہ اگر ترقیاتی بجٹ کو مؤثر طریقے سے استعمال کیا گیا تو یہ شرح نمو حاصل کی جا سکتی ہے، تاہم اس کے لیے حکومتی اداروں میں ہم آہنگی اور شفافیت ضروری ہو گی۔