یورپی قیادت کا یوکرین کے مستقبل پر فیصلہ یوکرینیوں اور یورپیوں کی رضا مندی سے مشروط

برسلز : یورپی یونین کے رہنماؤں نے یوکرین اور یورپی ممالک کی شمولیت کے بغیر یوکرین میں کسی بھی امن معاہدے کے مذاکرات کو مسترد کر دیا ہے۔ فرانسیسی صدر ایمانوئل میکرون نے یوکرینی صدر ولادیمیر زیلنسکی کے ساتھ پیرس میں ملاقات کے بعد ایک مشترکہ پریس کانفرنس میں کہا کہ روس اور یوکرین کے درمیان کسی بھی امن منصوبے کو صرف یوکرین اور یورپ کی شمولیت کے ساتھ ہی حتمی شکل دی جا سکتی ہے۔

چینی میڈیا کی رپورٹ کے مطابق، میکرون، جرمن چانسلر فریڈرک مرز اور دیگر یورپی رہنماؤں نے اس بات پر زور دیا کہ یوکرین اور یورپ کی غیر موجودگی میں امن مذاکرات کا کوئی نتیجہ نہیں نکلے گا۔

میکرون نے مزید کہا کہ یوکرین کی یورپی یونین میں ممکنہ شمولیت، روسی اثاثوں کا معاملہ اور سیکیورٹی کی ضمانتیں صرف یورپی رہنماؤں کے ساتھ ہی طے کی جا سکتی ہیں۔ انہوں نے یہ بھی واضح کیا کہ فی الحال کوئی حتمی امن منصوبہ تیار نہیں کیا گیا۔

یوکرینی صدر نے کہا کہ یوکرین نے جنگ کو عزت کے ساتھ ختم کرنے کی کوشش کی ہے اور اس نے مضبوط سیکیورٹی ضمانتوں کا مطالبہ کیا ہے۔ انہوں نے یہ بھی کہا کہ آئندہ مذاکرات میں علاقائی مسائل سب سے زیادہ پیچیدہ ثابت ہوں گے۔

جرمن چانسلر مرز نے اس بات کی تردید کی کہ یوکرینی قیادت پر کوئی امن منصوبہ زبردستی مسلط کیا جائے گا۔ پولینڈ کے وزیرِاعظم ڈونلڈ ٹسک نے یوکرین کی بھرپور حمایت کا اظہار کرتے ہوئے یورپ کی سلامتی کے لیے مشترکہ کوششوں پر زور دیا۔

لیٹویا کے صدر ایڈگرس رنکیوکس نے کہا کہ یوکرین میں ممکنہ امن معاہدے میں یورپ کو بھی شامل کیا جانا چاہیے۔