حریت رہنما سید علی شاہ گیلانی کی چوتھی برسی آج منائی جا رہی ہے

مظفرآباد : آج لائن آف کنٹرول کے دونوں طرف اور دنیا بھر میں کشمیری بابائے حریت سید علی گیلانی کی چوتھی برسی منائی جا رہی ہے۔ وہ ایک ایسے بزرگ رہنما تھے جنہوں نے بھارت کے ظلم و جبر کو سہتے ہوئے اپنی جان تک قربان کر دی، مگر غلامی کو کبھی تسلیم نہیں کیا۔

سید علی گیلانی 1929 میں مقبوضہ کشمیر کے بانڈی پورہ کے گاؤں زرمنز میں پیدا ہوئے۔ انہوں نے اپنی تعلیم لاہور کے اورینٹل کالج سے حاصل کی اور 1949 میں جماعت اسلامی میں شامل ہو گئے۔ اپنی زندگی کا بیشتر حصہ انہوں نے کشمیری قوم کی آزادی کے لیے جدوجہد میں گزارا۔

1961 میں انہوں نے اپنی سرکاری ملازمت چھوڑ کر کشمیری عوام کی خدمت میں بھرپور حصہ لیا۔ وہ کئی بار گرفتار ہوئے اور قید و بند کی صعوبتیں سہتے رہے، مگر ہمیشہ حق کے لیے آواز بلند کرتے رہے۔ 1994 میں انہوں نے کل جماعتی حریت کانفرنس قائم کی تاکہ کشمیریوں کی آواز کو ایک مضبوط انداز میں دنیا تک پہنچایا جا سکے۔

2010 میں نظر بندی کے بعد بھی ان کا جذبہ کم نہ ہوا۔ آخر کار یکم ستمبر 2021 کو وہ اللہ کے حضور چلے گئے، مگر ان کی قربانیاں اور جدوجہد آج بھی کشمیریوں کے دلوں میں زندہ ہیں۔

حکومت پاکستان نے انہیں نشان پاکستان سے نواز کر ان کی خدمات کو تسلیم کیا۔ آج بھی کشمیری ان کے جذبے اور حوصلے سے روشنی حاصل کرتے ہیں اور آزادی کے خواب کو زندہ رکھتے ہیں۔