خالصتان ریفرنڈم کے لیے عالمی مہم میں تیزی: ایس ایف جے کی صدر ٹرمپ کو ایک ارب ڈالر کے تعاون کی پیشکش

کراچی پریس کلب : سکھ فار جسٹس کے رہنما گرپتونت سنگھ پنوں نے جنوبی ایشیا میں امن اور سکھوں کے حقِ خودارادیت کے لیے ایک بڑے مالی پیکیج کا اعلان کر دیا ہے۔ انہوں نے امریکی صدر ڈونلڈ ٹرمپ کے 'بورڈ آف پیس' کے قیام کا خیرمقدم کرتے ہوئے اس میں شمولیت کے لیے ایک ارب ڈالر کی پیشکش کی ہے، تاکہ بھارتی حکومت کو پنجاب میں خالصتان ریفرنڈم کے لیے مذاکرات کی میز پر لایا جا سکے۔ بیان میں پنجاب کو "جنوبی ایشیا کا گرین لینڈ" قرار دیتے ہوئے کہا گیا کہ اس کی جغرافیائی اہمیت عالمی امن کے لیے ریڑھ کی ہڈی کی حیثیت رکھتی ہے۔
 مودی حکومت کی جانب سے حالیہ دنوں میں 8,000 سکھوں کی گرفتاری اور ماورائے عدالت قتل کے الزامات کو دنیا کے سامنے لایا گیا۔  پنوں نے واضح کیا کہ بھارت کی موجودہ پالیسیاں پاکستان اور بنگلہ دیش سمیت پورے خطے کی سلامتی کے لیے خطرہ ہیں۔انہوں نے کہا کہ ایک آزاد جمہوریہ خالصتان، امریکہ کا ایک مضبوط اور قابلِ اعتماد دفاعی پارٹنر ثابت ہو سکتا ہے۔
گرپتونت سنگھ پنوں نے خبردار کیا کہ سکھ قوم پُرامن جمہوری عمل (ریفرنڈم) پر یقین رکھتی ہے، جس میں اب تک 20 لاکھ سے زائد سکھ حصہ لے چکے ہیں۔ تاہم، اگر بھارت نے ووٹ کا جواب گولی اور ریاستی جبر سے دینا جاری رکھا تو یہ خطہ ایک خطرناک تصادم کی لپیٹ میں آ سکتا ہے۔ انہوں نے پاکستانی قیادت کے امن وژن کی بھی تعریف کی اور امید ظاہر کی کہ صدر ٹرمپ کا 'بورڈ آف پیس' اس دیرینہ تنازعے کے حل میں اپنا کردار ادا کرے گا۔