ٹرمپ کا جاپان میں پاک بھارت جنگ کا ذکر، ایٹمی طاقتوں کے درمیان جنگ رکوانے کا دعویٰ

ٹوکیو :  امریکی صدر ڈونلڈ ٹرمپ نے جاپان میں ایک تقریب کے دوران پاکستان اور بھارت کے درمیان ہونے والی ممکنہ جنگ کا ذکر کیا۔ ان کا کہنا تھا کہ جب دونوں ممالک آپس میں الجھ گئے تھے، بھارت کے 7 جدید جنگی طیارے تباہ ہوئے۔ ٹرمپ نے بتایا کہ اس دوران انہوں نے بھارتی وزیراعظم نریندر مودی، پاکستانی وزیراعظم اور فیلڈ مارشل سے رابطہ کیا اور انہیں خبردار کیا کہ اگر یہ جنگ ہوئی تو دنیا بھر کی تجارت متاثر ہو گی۔

ٹرمپ نے مزید کہا کہ انہوں نے دونوں ممالک کو جنگ سے روکا اور یہ تنازعہ صرف 24 گھنٹوں میں ختم ہو گیا، جو ان کے لیے کافی حیران کن تھا۔ انہوں نے یہ بھی دعویٰ کیا کہ اپنے دورِ صدارت میں انہوں نے آٹھ جنگوں کو رکوانا ممکن بنایا اور ملائیشیا میں بھی دو ملکوں کے درمیان جنگ بندی کرانے میں کامیاب ہوئے۔

اس کے بعد، امریکی صدر جاپان میں موجود امریکی فوجی اڈے کا دورہ کرنے کے لیے گئے، جہاں انہوں نے جاپان کے لیے امریکی میزائلوں کی پہلی کھیپ کی منظوری دی۔ ٹرمپ نے اس موقع پر کہا کہ امریکہ اور جاپان کے تعلقات خطے میں امن اور استحکام کے لیے اہم ہیں، اور امریکی میزائل جاپان کے ایف 35 طیاروں میں استعمال کیے جائیں گے۔ انہوں نے مزید کہا کہ "ہمارے دورِ حکومت میں امریکہ ایک بار پھر عظیم بن رہا ہے۔"

ٹرمپ اور جاپانی وزیراعظم نے نایاب معدنیات کی فراہمی کے معاہدے پر دستخط کیے، اور جاپان کی پہلی خاتون وزیراعظم نے بھی ٹرمپ کی امن کوششوں کی تعریف کی۔