پاکستان میں ہفتہ وار اشیاء خوردونوش کی قیمتوں میں 0.62 فیصد اضافہ، سالانہ مہنگائی 3.57 فیصد تک پہنچ گئی

اسلام آباد: ملک بھر میں گزشتہ ہفتے کے دوران ضروری اشیاء کی قیمتوں میں اوسطاً 0.62 فیصد اضافہ ریکارڈ کیا گیا ہے، جبکہ سالانہ بنیادوں پر مہنگائی کی شرح 3.57 فیصد تک پہنچ گئی ہے، یہ معلومات ادارہ برائے شماریات پاکستان نے جاری کی ہیں۔

شماریاتی رپورٹ کے مطابق گذشتہ ہفتے روزمرہ استعمال کی 6 اشیاء کی قیمتوں میں کمی واقع ہوئی، جب کہ 27 اشیاء کی قیمتیں مستحکم رہیں۔ دوسری جانب 18 اشیاء کی قیمتوں میں اضافہ نوٹ کیا گیا۔

سب سے زیادہ مہنگائی ٹماٹر میں دیکھی گئی جو کہ 14.98 فیصد رہی، اس کے بعد آٹے کی قیمت میں 12.11 فیصد اور چکن میں 3.36 فیصد اضافہ ہوا۔ علاوہ ازیں آلو، سرسوں کے تیل، انڈے، ایل پی جی، گوشت، لہسن، پرنٹڈ لان، جلانے کی لکڑی اور لانگ کلاتھ کی قیمتوں میں بھی معمولی اضافہ ہوا ہے۔

جبکہ دال ماش، دال مسور، دال چنا، کیلا، دو سے ڈیڑھ کلو بناسپتی گھی اور پیاز کی قیمتوں میں معمولی کمی دیکھی گئی ہے۔

ماہرین کا کہنا ہے کہ موسمی حالات کی وجہ سے سبزیوں اور دیگر اشیاء کی قیمتوں میں اتار چڑھاؤ ایک عام بات ہے، تاہم حکومت قیمتوں کو کنٹرول کرنے کے لیے مؤثر اقدامات کر رہی ہے تاکہ صارفین کو سہولت فراہم کی جا سکے۔