اگر ایران کے ساتھ کوئی معاہدہ نہ ہو سکا تو امریکہ اپنا مشن مکمل کرے گا:ٹرمپ

امریکی صدر ڈونلڈ ٹرمپ نے فاکس نیوز کو ٹیلیفونک انٹرویو دیتے ہوئے کہا ہے کہ ایران کے معاملے پر امریکہ کا مؤقف انتہائی سخت ہے اور تہران کو مزید کسی معاہدے کی خلاف ورزی کی اجازت نہیں دی جا سکتی۔

صدر ٹرمپ نے کہا کہ ان کی خواہش ہے کہ ایران کی توانائی تنصیبات، پاور پلانٹس اور پلوں کو نشانہ بنانے سے گریز کیا جائے، تاہم اگر ایران کے ساتھ کوئی معاہدہ نہ ہو سکا تو امریکہ اپنا مشن مکمل کرے گا۔

انہوں نے دعویٰ کیا کہ ایران ایٹمی ہتھیار نہ رکھنے پر اتفاق کر چکا ہے، جبکہ امریکہ کی پوزیشن ایران کے مقابلے میں کہیں زیادہ مضبوط ہے۔ ٹرمپ نے مزید کہا کہ آبنائے ہرمز پر ایران نہیں بلکہ امریکہ کا کنٹرول ہے۔

امریکی صدر نے گفتگو کے دوران یہ بھی دعویٰ کیا کہ اگر وہ امریکہ کے صدر نہ ہوتے تو آج اسرائیل کا وجود نہ ہوتا۔