کشمیر اور پاکستان ہمیشہ ایک ہیں، آزادی کی صبح ضرور آئے گی، مریم نواز

لاہور: وزیراعلیٰ پنجاب مریم نواز شریف نے مقبوضہ کشمیر پر بھارت کے غاصبانہ قبضے کے خلاف یومِ سیاہ کے موقع پر ایک خاص پیغام دیا ہے، جس میں انہوں نے کہا کہ کشمیر اور پاکستان کا رشتہ کبھی جدا نہیں ہو سکتا۔

مریم نواز نے 27 اکتوبر 1947 کو بھارت کے کشمیر پر قبضے کو تاریخ کا ایک سیاہ باب قرار دیتے ہوئے کہا کہ یہ دن بھارت کے لیے شرمندگی کا باعث ہے، اور بھارتی قیادت پر اس سیاہ باب کی سیاہی نمایاں ہو چکی ہے۔ "پاکستان ہمیشہ کشمیریوں کے ساتھ کھڑا رہے گا اور ان کی اخلاقی اور سفارتی حمایت جاری رکھے گا۔"

وزیراعلیٰ نے مزید کہا کہ پاکستان نے آپریشن بنیان مرصوص میں بھارتی غرور کو خاک میں ملا دیا، جس کے بعد بھارتی قیادت وزیراعظم شہباز شریف سے ملاقات کرنے کی جرات نہیں رکھتی۔ "امریکی صدر کا وزیراعظم شہباز شریف اور فیلڈ مارشل حافظ عاصم منیر کو عظیم قرار دینا بھارت کے لیے ایک اور شکست کا پیغام ہے،" انہوں نے کہا۔

مریم نواز شریف نے اس بات پر زور دیا کہ کشمیر اور پاکستان کا رشتہ لازوال ہے، اور کوئی بھی طاقت انہیں الگ نہیں کر سکتی۔ "ہم کشمیری بھائیوں کے ساتھ ہیں اور ہمیشہ ان کے ساتھ رہیں گے۔ لاکھوں بے گناہ کشمیریوں کا خون ضرور رنگ لائے گا اور مقبوضہ کشمیر میں آزادی کی روشن صبح ضرور طلوع ہوگی۔"