ملک بھر میں عیدالاضحیٰ ،روایتی جوش وخروش ، سنتِ ابراہیمیؑ کا آغاز

لاہور: ملک بھر میں آج عیدالاضحیٰ کا تہوار روایتی جوش و خروش اور مذہبی عقیدت و احترام کے ساتھ منایا جا رہا ہے۔

دن کا آغاز مساجد اور عیدگاہوں میں نمازِ عید کے روح پرور اجتماعات سے ہوا، جہاں لاکھوں شہریوں نے نماز ادا کی۔ اس موقع پر ملکی سلامتی، امن و امان اور خوشحالی کے لیے خصوصی دعائیں کی گئیں، جبکہ جڑواں شہروں سمیت کراچی، لاہور، پشاور اور کوئٹہ میں سیکیورٹی کے انتہائی سخت انتظامات دیکھنے کو آئے۔

نمازِ عید کے فوری بعد سنتِ ابراہیمیؑ کی ادائیگی کے لیے اللہ کی راہ میں جانوروں کی قربانی کا سلسلہ شروع ہو گیا ہے، جو عید کے تینوں دن جاری رہے گا۔ شہری قربانی کے گوشت کی مستحقین اور عزیز و اقارب میں تقسیم کو یقینی بنا رہے ہیں، جبکہ مقامی انتظامیہ کی جانب سے شہروں کو صاف رکھنے کے لیے آلائشیں اٹھانے کا کام بھی تیزی سے جاری ہے۔