جیسن گلیسپی نئی فرنچائز 'حیدرآباد' کے ہیڈ کوچ مقرر

کراچی : پاکستان سپر لیگ (PSL) کے مداحوں کے لیے بڑی خبر سامنے آگئی ہے۔ پاکستان کرکٹ ٹیم کے سابق ریڈ بال کوچ اور آسٹریلیا کے مایہ ناز فاسٹ بولر جیسن گلیسپی اب پی ایس ایل کے میدانوں میں ایکشن میں نظر آئیں گے۔
ذرائع کا دعویٰ ہے کہ پی ایس ایل کی نئی فرنچائز 'حیدرآباد' نے اپنی ٹیم کی کمان سنبھالنے کے لیے جیسن گلیسپی کا انتخاب کر لیا ہے۔ دونوں فریقین کے درمیان معاہدہ طے پا چکا ہے جس کے تحت وہ بطور ہیڈ کوچ خدمات انجام دیں گے۔جیسن گلیسپی کے لیے پاکستان کا ماحول نیا نہیں ہے۔ وہ حال ہی میں پاکستان کی ٹیسٹ ٹیم کے ہیڈ کوچ رہ چکے ہیں، اور ان کی اسی مہارت اور پاکستانی پچز کے تجربے کو دیکھتے ہوئے حیدرآباد فرنچائز نے انہیں بھاری ذمہ داری سونپی ہے۔
حیدرآباد کی انتظامیہ اپنی برانڈنگ کے حوالے سے حتمی مراحل میں ہے۔     جلد ہی ایک شاندار تقریب میں ٹیم کے نام اور لوگو کی رونمائی کی جائے گی۔    مینجمنٹ اور دیگر معاون عملے (Support Staff) کے ناموں کا اعلان بھی جلد متوقع ہے۔
جیسن گلیسپی جیسے قد آور کوچ کی آمد سے پی ایس ایل کی نئی ٹیم کو آغاز سے ہی ایک پیشہ ورانہ سمت ملنے کی امید ہے۔