رواں برس شیخ ڈاکٹر صالح بن حمید کو یوم عرفہ کا خطبہ دینے کی منظوری دیدی گئی

مکہ مکرمہ: اس برس حج کے موقع پر یوم عرفہ کا خطبہ مسجد الحرام کے امام و خطیب، شیخ ڈاکٹر صالح بن عبد اللہ بن حمید دیں گے۔ خادم الحرمین الشریفین شاہ سلمان بن عبدالعزیز نے ان کو خطبہ دینے کی باضابطہ منظوری دے دی ہے۔

حرمین شریفین انتظامیہ کا کہنا ہے کہ شاہ سلمان کی اجازت کے بعد یہ ذمہ داری شیخ صالح بن حمید کو سونپی گئی ہے۔

یاد رہے کہ عرفات میں واقع مسجد نمرہ میں سب سے زیادہ بار یوم عرفہ کا خطبہ سعودی عرب کے مفتی اعظم شیخ عبدالعزیز آل الشیخ دے چکے ہیں، جنہوں نے یہ خطبہ 34 مرتبہ دیا ہے۔ دوسرے نمبر پر شیخ عبد اللہ بن حسن آل الشیخ ہیں، جنہوں نے مسلسل 25 سال تک یوم عرفہ کا خطبہ دیا۔

گزشتہ سال یوم عرفہ کا خطبہ شیخ ماہر المعیقلی نے دیا تھا۔