یومِ عاشور کے موقع پر ملک بھر میں عقیدت و احترام کا اظہار

اسلام آباد: حضرت امام حسینؓ اور شہدائے کربلا کی عظیم قربانی کی یاد میں یومِ عاشور (10 محرم الحرام) کے موقع پر آج ملک بھر میں مجالسِ عزا اور ماتمی جلوس منعقد کیے جا رہے ہیں۔

ملک کے مختلف شہروں اور قصبوں میں عزادار شہدائے کربلا کو خراجِ عقیدت پیش کر رہے ہیں، جبکہ علمائے کرام اور ذاکرین اپنے خطابات میں حضرت امام حسینؓ کی سیرت، ان کی لازوال قربانی اور واقعۂ کربلا کے پیغام پر روشنی ڈال رہے ہیں۔

اس موقع پر علم، تعزیہ اور ذوالجناح کے جلوس بھی نکالے جا رہے ہیں، جن میں بڑی تعداد میں عزادار شریک ہیں۔

یومِ عاشور کے موقع پر امن و امان برقرار رکھنے کے لیے ملک بھر میں سکیورٹی کے سخت انتظامات کیے گئے ہیں۔ جلوسوں اور مجالس کے راستوں پر پولیس، رینجرز اور دیگر قانون نافذ کرنے والے ادارے تعینات ہیں تاکہ کسی بھی ناخوشگوار واقعے سے بچا جا سکے۔