مون سون کی بارشوں نے پنجاب میں موسم خوشگوار کر دیا

لاہور: مون سون کی بارشوں نے لاہور اور پنجاب کے مختلف شہروں میں موسم کو خوشگوار اور دلفریب بنا دیا۔ لاہور میں بادلوں نے شہر کا منظر ہی بدل دیا، اور مختلف علاقوں جیسے ٹاؤن شپ، کینال روڈ، ہربنس پورہ، کاہنہ اور تاج باغ میں بارش نے موسم کو اور بھی خوشگوار بنا دیا۔

لیکن بارش کے ساتھ ہی لاہور میں کئی فیڈرز ٹرپ ہو گئے جس سے بجلی کی فراہمی متاثر ہوئی اور شہریوں کو شدید مشکلات کا سامنا کرنا پڑا۔

اسلام آباد اور راولپنڈی میں بھی بارشوں کا سلسلہ جاری رہا، جس سے وہاں کا موسم بھی خوشگوار ہو گیا۔ گوجرانوالہ، فیصل آباد، سیالکوٹ، گجرات اور دیگر شہروں میں بھی بارشوں کے بعد موسم مزید ٹھنڈا اور خوشگوار ہو گیا۔ تاہم بارشوں کی وجہ سے کچھ نشیبی علاقے زیر آب آ گئے، جس نے مقامی آبادی کے لیے پریشانی پیدا کر دی۔

وزیراعلیٰ پنجاب مریم نواز شریف کی ہدایات پر واسا کی ٹیمیں تمام علاقوں میں الرٹ ہو گئی ہیں تاکہ بارشوں کے اثرات سے فوری نمٹا جا سکے۔

مری، آزاد کشمیر، مالم جبہ اور کالام میں بھی بارش ہوئی، اور ایبٹ آباد میں بارشوں کے باعث ندیوں میں طغیانی آ گئی جس سے لینڈ سلائیڈنگ کا خطرہ پیدا ہو گیا۔ مرکزی شاہراہیں بند ہونے سے سیاح پھنس گئے۔

نیشنل ڈیزاسٹر مینجمنٹ اتھارٹی (این ڈی ایم اے) نے آئندہ 12 سے 24 گھنٹوں میں مزید طوفان اور بارشوں کا الرٹ جاری کر دیا ہے، جس کے پیش نظر تمام متعلقہ اداروں کو حفاظتی اقدامات مزید بڑھانے کی ہدایت کی گئی ہے۔