حکومت نے یکم ربیع الاول سے عشرہ جشن رحمت اللعالمین منانے کا اعلان کر دیا

اسلام آباد : حکومت نے اعلان کیا ہے کہ یکم ربیع الاول سے دس روزہ جشن رحمت اللعالمین ﷺ مذہبی جوش و جذبے کے ساتھ منایا جائے گا۔ وزیر مذہبی امور سردار یوسف نے بتایا کہ اسلام آباد میں سیرت النبی ﷺ پر کانفرنس کا انعقاد کیا جائے گا۔ انہوں نے کہا کہ نبی کریم ﷺ نے ہمیں محبت، امن اور بھائی چارے کا درس دیا ہے۔

سردار یوسف نے کہا کہ نبی ﷺ کی تعلیمات ہماری رہنمائی کرتی ہیں اور ہمیں قومی اتحاد اور مذہبی ہم آہنگی کو فروغ دینا چاہیے۔

گورنر ہاؤس سندھ میں عید میلاد النبی ﷺ کے حوالے سے اجلاس ہوا جس میں علماء کرام نے شرکت کی۔ گورنر کامران ٹیسوری نے کہا کہ یکم سے 30 ربیع الاول تک مختلف محافل منعقد کی جائیں گی اور وہ اپنے ذاتی وسائل سے اس کے اخراجات اٹھائیں گے۔ انہوں نے واضح کیا کہ گورنر ہاؤس کے کسی بھی پروگرام کے لیے عوام کا ٹیکس استعمال نہیں ہوتا۔