او جی ڈی سی ایل کی ریکوڈک منصوبے کی فزیبلٹی سٹڈی مکمل، 627 ملین ڈالر کی سرمایہ کاری کی تصدیق 

اسلام آباد:  او جی ڈی سی ایل نے ریکوڈک منصوبے کی فزیبلٹی سٹڈی مکمل کر لی ہے اور اس کے لیے 627 ملین ڈالر کی سرمایہ کاری کی تصدیق کی ہے۔

او جی ڈی سی ایل کے بورڈ آف ڈائریکٹرز نے اس منصوبے کے لیے فنانسنگ انتظامات کی منظوری دے دی ہے، جس میں 13.1 ملین ٹن تانبہ اور 17.9 ملین اونس سونا حاصل کرنے کی توقع ہے۔ او جی ڈی سی ایل کا اس منصوبے میں شیئر 8.33 فیصد ہو گا۔

پروجیکٹ کے پہلے مرحلے میں 2028 سے سالانہ 45 ملین ٹن پروسیسنگ کی جائے گی۔ اس مرحلے کے لیے 3 ارب ڈالر کی سرمایہ کاری منظور کی گئی ہے، جس کے نتیجے میں او جی ڈی سی ایل کے شیئرز میں 2.76 فیصد کا اضافہ ہوا ہے۔

ریکوڈک منصوبے میں او جی ڈی سی ایل کے علاوہ پی پی ایل، جی ایچ پی ایل، بیرک گولڈ اور بلوچستان حکومت بھی شراکت دار ہیں۔ دوسرے مرحلے میں پروسیسنگ کی صلاحیت 90 ملین ٹن سالانہ تک بڑھانے کا منصوبہ ہے، جس سے پاکستان کی معدنیات کی پیداوار میں اضافہ اور ترقی ہوگی۔