وزیراعظم شہباز شریف کی عالمی رہنماؤں سے ملاقاتیں، صدر ٹرمپ کو امن کے لیے کردار پر خراجِ تحسین

نیویارک: وزیراعظم شہباز شریف نے کہا ہے کہ امریکی صدر ڈونلڈ ٹرمپ دنیا میں امن قائم کرنے کی سنجیدہ کوششیں کر رہے ہیں اور وہ حقیقی معنوں میں امن کے داعی ہیں۔

نیویارک میں میڈیا سے گفتگو کرتے ہوئے وزیراعظم کا کہنا تھا کہ صدر ٹرمپ نے اقوام متحدہ کی جنرل اسمبلی میں اپنے خطاب میں امن کے لیے جو مؤقف اپنایا، وہ قابلِ تعریف ہے۔ انہوں نے کہا کہ پاک بھارت کشیدگی میں کمی لانے اور جنگ بندی کی کوششوں میں بھی صدر ٹرمپ اور ان کی ٹیم نے اہم کردار ادا کیا، جس پر ہم ان کے شکر گزار ہیں۔

وزیراعظم شہباز شریف نے نیویارک میں عالمی رہنماؤں سے ملاقاتوں کا سلسلہ بھی جاری رکھا۔ ان کی آسٹریا کے چانسلر کرسچن سٹاکر سے ملاقات ہوئی جس میں باہمی دلچسپی کے شعبوں میں تعاون بڑھانے پر بات ہوئی۔

اسی طرح وزیراعظم کی امیر قطر، اردن کے بادشاہ، انڈونیشیا کے صدر اور کویت کے ولی عہد شیخ صباح الخالد سے بھی ملاقاتیں ہوئیں۔ ان ملاقاتوں میں دوطرفہ تعلقات، اقتصادی تعاون اور مختلف شعبوں میں باہمی روابط بڑھانے پر اتفاق کیا گیا۔

کویت کے ولی عہد کے ساتھ ملاقات میں خاص طور پر تجارت، سرمایہ کاری، زراعت اور لائیو اسٹاک جیسے شعبوں میں تعاون کو مزید مضبوط بنانے کی خواہش کا اظہار کیا گیا، جبکہ موجودہ تعلقات پر اطمینان بھی ظاہر کیا گیا۔

وزیراعظم کی ان سفارتی سرگرمیوں کا مقصد دنیا بھر میں پاکستان کے مثبت کردار کو اجاگر کرنا اور مختلف ممالک کے ساتھ تعلقات کو مزید مستحکم بنانا ہے۔