علاقائی روابط میں اضافے سے معاشی اورتجارتی شعبے میں انقلاب آئے گا:وزیراعظم شہباز شریف

اسلام آباد: وزیراعظم محمد شہباز شریف نے اعلان کیا ہے کہ پاکستان اقتصادی راہداری (CPEC) کے دوسرے مرحلے میں داخل ہو رہا ہے، جس کے ذریعے پاکستان کے معاشی اور تجارتی شعبوں میں انقلاب آئے گا۔ اس پیش رفت سے نہ صرف پاکستان، بلکہ پورے خطے میں اقتصادی اور علاقائی روابط کو نئی سمت ملے گی۔

وزیراعظم نے یہ بات ریجنل ٹرانسپورٹ منسٹرز کانفرنس کی اختتامی نشست سے خطاب کرتے ہوئے کہی۔ انہوں نے کہا کہ یہ کانفرنس دوطرفہ اور علاقائی روابط کو فروغ دینے کے لیے ایک اہم موقع فراہم کر رہی ہے، جس سے نہ صرف تجارتی تعلقات بہتر ہوں گے بلکہ عالمی سطح پر پاکستان کی پوزیشن بھی مضبوط ہو گی۔

وزیراعظم نے مزید کہا کہ پاکستان کی بندرگاہیں، گوادر اور کراچی، عالمی تجارتی راستوں کا اہم حصہ بن چکی ہیں اور پاکستان اقتصادی راہداری کے دوسرے مرحلے کے ذریعے ان روابط کو مزید مستحکم کرے گا۔ انہوں نے اس بات پر زور دیا کہ بڑے منصوبے جیسے ٹرانس افغان ریلوے اور اسلام آباد، تہران، استنبول ریلوے کوریڈور سے خطے کی اقتصادی صلاحیتیں آپس میں جڑیں گی اور ایک نیا معاشی انقلاب آئے گا۔

ڈیجیٹل انفراسٹرکچر کے حوالے سے وزیراعظم نے کہا کہ پاکستان ڈیجیٹل دور میں قدم بڑھا رہا ہے، اور حکومت نے اس شعبے میں سرمایہ کاری کی ہے تاکہ ملک کی نوجوان نسل جدید ٹیکنالوجی کے تقاضوں سے ہم آہنگ ہو سکے۔

وزیراعظم نے اپنے خطاب کے آخر میں کہا کہ علاقائی روابط میں اضافہ معاشی، تجارتی اور توانائی کے شعبوں میں نئی امیدیں پیدا کرے گا، اور اس سے پورے خطے میں خوشحالی کا نیا دور شروع ہوگا۔