پاکستانی باکسنگ چیمپئن عثمان وزیر کا اداکارہ ہانیہ عامر کی باکسنگ تربیت کا آغاز

اسلام آباد: پاکستانی باکسنگ کے عالمی چیمپئن عثمان وزیر اداکارہ ہانیہ عامر کو باکسنگ کی تربیت دے رہے ہیں تاکہ وہ اس کھیل میں مہارت حاصل کر سکیں اور مستقبل میں مقابلوں میں حصہ لے سکیں۔

نجی ٹی وی پروگرام میں گفتگو کرتے ہوئے عثمان وزیر نے بتایا کہ ہانیہ اس وقت باقاعدہ باکسنگ ٹریننگ لے رہی ہیں اور اس کھیل میں اپنی لگن اور غیر معمولی صلاحیت کا مظاہرہ کر رہی ہیں۔ انہوں نے کہا:
"ہانیہ ایک پرجوش فائٹر ہیں اور بہت جلد مقابلوں کے لیے تیار ہو جائیں گی۔"

عثمان وزیر نے حکومت کی جانب سے وعدہ کی گئی مالی معاونت نہ ملنے پر بھی اپنے تحفظات کا اظہار کیا، اور کہا کہ محنتی کھلاڑیوں کی حمایت کے بغیر عالمی سطح پر کامیابی حاصل کرنا مشکل ہو جاتا ہے۔ انہوں نے اپنی کامیابیوں کا ذکر کرتے ہوئے بھارت کے کھلاڑیوں کو شکست دینے کی مثال بھی دی۔

اس موقع پر سابق قومی کرکٹر شاہد آفریدی نے بھی فون کے ذریعے رابطہ کیا اور عثمان وزیر کی کارکردگی کو سراہا۔ شاہد آفریدی نے اعلان کیا کہ وہ اپنی فاؤنڈیشن کے ذریعے عثمان وزیر کی معاونت کریں گے اور کہا کہ ایسے باصلاحیت اور محنتی کھلاڑیوں کی سپورٹ ہم سب کی ذمہ داری ہے۔

واضح رہے کہ عثمان وزیر پاکستان کے ابھرتے ہوئے باکسر ہیں، جنہوں نے اپنی مہارت اور محنت کے ذریعے عالمی سطح پر نام کمایا ہے اور نوجوان کھلاڑیوں کے لیے مشعل راہ بن چکے ہیں۔