وزیراعظم شہباز شریف کی قطر اور سعودی عرب کے سفیروں سے گفتگو ، ایرانی میزائل حملے پر گہری تشویش کا اظہار

اسلام آباد :  وزیراعظم شہباز شریف نے قطر اور سعودی عرب کے سفیروں سے ٹیلیفون پر رابطہ کیا اور قطر میں واقع امریکی فوجی اڈے پر ایرانی میزائل حملے پر اپنی تشویش کا اظہار کیا ہے۔ انہوں نے کہا کہ اس قسم کے حملے خطے میں کشیدگی کو بڑھاتے ہیں اور امن کے لیے خطرہ ہیں، لہٰذا ضروری ہے کہ تمام فریق مل کر امن قائم کرنے کی کوشش کریں۔

وزیراعظم نے قطری سفیر علی مبارک الخاطر کو یقین دہانی کرائی کہ پاکستان قطر کے ساتھ کھڑا ہے اور خطے میں کشیدگی کم کرنے کے لیے تعاون کو فروغ دے گا۔ قطری سفیر نے وزیراعظم کے اس اقدام کو سراہا اور یکجہتی پر شکریہ ادا کیا۔

اسی طرح، وزیراعظم نے سعودی عرب کے سفیر نواف المالکی سے بھی رابطہ کیا اور ان سے کہا کہ پاکستان سعودی عرب کے ساتھ مل کر مشرق وسطیٰ میں امن کی کوششوں کو تیز کرے گا۔ سعودی سفیر نے اس پیشگی رابطے اور تشویش کے اظہار پر وزیراعظم کا شکریہ ادا کیا اور کہا کہ دونوں ممالک کو مل کر امن کی راہ میں تعاون جاری رکھنا چاہیے۔

دوسری جانب، ایران نے امریکی حملے کے جواب میں قطر کے العدید فوجی اڈے کو میزائل حملے سے نشانہ بنایا، جس کی تصدیق ایران کے سرکاری ٹی وی نے بھی کی ہے۔ اس واقعے نے خطے کی صورتحال کو مزید کشیدہ کر دیا ہے۔