راک کی دنیا کے لیجنڈ اوزی اوسبورن کا 76 سال کی عمر میں انتقال

لندن : اوزی اوسبورن، جنہیں دنیا ’پرنس آف ڈارکنس‘ کے نام سے جانتی ہے، 76 برس کی عمر میں وفات پا گئے۔ انہوں نے اپنی منفرد آواز اور ہیوی میٹل موسیقی کے انداز سے پوری دنیا میں پہچان بنائی۔

ابتدائی دور میں ان کے بینڈ بلیک سبتھ کو سخت تنقید کا سامنا کرنا پڑا اور بعض لوگوں نے ان کی موسیقی کو شیطانی قرار دیا، لیکن نوجوان نسل نے ان کے منفرد انداز کو بہت پسند کیا۔ موسیقی کے ماہرین اوزی کی آواز کو ایک خاص طاقت اور پہچان کے طور پر دیکھتے ہیں، جس نے ہیوی میٹل موسیقی کو نئی جہت دی۔

ذاتی زندگی میں اوزی نے منشیات اور شراب نوشی جیسے مسائل کا سامنا کیا، لیکن ان کی اہلیہ اور منیجر شیری اوسبرن نے 1980 کی دہائی میں ان کے سولو کیریئر کو کامیابی سے آگے بڑھایا۔ ان کا پہلا سولو البم ’Blizzard of Ozz‘ بہت مقبول ہوا۔

2000 کی دہائی میں ایم ٹی وی کا شو ’دی اوسبورنس‘ نے اوزی کو عوام کے دلوں کے قریب کیا اور ان کی ذاتی زندگی کو بھی اجاگر کیا۔ انہوں نے دوبارہ بلیک سبتھ کے ساتھ کام کیا اور ان کا البم ’13‘ امریکی چارٹس میں پہلے نمبر پر رہا۔

اوزی اپنی متنازع حرکات کی وجہ سے بھی مشہور تھے، جیسے کہ چمگادڑ کا سر کاٹنے کا واقعہ، تاہم بعد میں انہوں نے اس پر معافی مانگی۔ اپنے آخری انٹرویو میں اوزی نے کہا کہ وہ ایک عام انسان تھے مگر انہوں نے بہت کچھ کیا اور امید ہے کہ لوگ انہیں یاد رکھیں گے۔

اوزی اوسبورن اپنی اہلیہ شیری، چھ بچوں اور ایک عظیم موسیقی ورثے کے ساتھ ہمیں چھوڑ کر چلے گئے۔ ان کی موسیقی ہمیشہ زندہ رہے گی۔