اسلام آباد میں شہریوں کی سہولت کے لیے کئی نئے ترقیاتی منصوبے شروع کرنے کا فیصلہ

اسلام آباد: وفاقی حکومت نے اسلام آباد میں شہریوں کی سہولت کے لیے کئی نئے ترقیاتی منصوبے شروع کرنے کا فیصلہ کیا ہے۔ وزیر داخلہ محسن نقوی کی صدارت میں سی ڈی اے میں ایک اہم اجلاس ہوا، جس میں ان منصوبوں کی منظوری دی گئی۔

فیصلے کے مطابق فیض آباد انٹرچینج کو ری ماڈل کیا جائے گا، جہاں ٹریفک کے دباؤ کو کم کرنے کے لیے دو نئی لینز بنائی جائیں گی۔ اسی طرح فیصل چوک پر بھی ایک انڈر پاس بنایا جائے گا تاکہ ٹریفک بہتر طریقے سے چل سکے۔

بلیو ایریا میں تیار ہونے والا پارکنگ پلازہ جلد عوام کے لیے کھولا جائے گا۔ اس پلازے میں دکانیں، روف ٹاپ ریسٹورنٹ، پلے ایریا اور سینما جیسی جدید سہولیات دستیاب ہوں گی۔ ساتھ ہی ایک فوڈ سٹریٹ بھی بنائی جا رہی ہے، جس میں بیٹھنے کی جگہ، پیدل چلنے کے ٹریک اور تفریحی سرگرمیوں کے لیے الگ جگہ ہو گی۔

وزیر داخلہ نے ہدایت دی ہے کہ ان منصوبوں کے لیے ایسا بزنس ماڈل بنایا جائے جو جدید بھی ہو اور حکومت کے لیے منافع بخش بھی۔ شہر کے دوسرے علاقوں میں بھی پارکنگ پلازے بنانے کا فیصلہ ہوا ہے۔ اجلاس میں دیگر اہم حکام بھی شریک تھے، جنہوں نے منصوبوں کی تفصیلات پر بریفنگ دی۔