سونے کی اڑان جاری، فی تولہ قیمت 4 لاکھ 42 ہزار 636 روپے تک پہنچ گئی

کراچی: بھر کی صرافہ مارکیٹوں میں سونے کی قیمتوں نے ایک بار پھر تیزی کا رخ اختیار کر لیا ہے۔ تازہ اضافے کے بعد فی تولہ سونا 4 ہزار 643 روپے مہنگا ہو کر 4 لاکھ 42 ہزار 636 روپے تک جا پہنچا ہے۔

آل پاکستان صرافہ جیمز اینڈ جیولرز ایسوسی ایشن کی جانب سے جاری اعداد و شمار کے مطابق 10 گرام سونے کی قیمت میں بھی 4 ہزار 179 روپے کا اضافہ ریکارڈ کیا گیا، جس کے بعد اس کی نئی قیمت 3 لاکھ 78 ہزار 345 روپے مقرر ہوئی ہے۔

معاشی ماہرین کے مطابق سونے کی خریداری میں بڑھتا ہوا رجحان اور محفوظ سرمایہ کاری کی جانب سرمایہ کاروں کا جھکاؤ مقامی مارکیٹ میں قیمتوں کے اضافے کی ایک اہم وجہ ہے۔ ان کا کہنا ہے کہ عالمی مالیاتی حالات اور پاکستانی روپے کی قدر میں مسلسل تبدیلیوں نے بھی سونے کے نرخوں کو اوپر دھکیلا ہے۔

عالمی سطح پر بھی سونا مہنگا ہوا ہے۔ ایران اور امریکا کے درمیان جاری مذاکرات میں پیش رفت کی خبروں کے بعد عالمی مارکیٹ میں اسپاٹ گولڈ کی قیمت 0.7 فیصد بڑھ کر 4,189.69 ڈالر فی اونس تک پہنچ گئی۔ اس سے قبل جمعہ کے روز سونا 11 جون کے بعد اپنی کم ترین سطح پر آ گیا تھا۔ تاہم امریکی گولڈ فیوچرز 0.9 فیصد کمی کے بعد 4,207.70 ڈالر فی اونس پر ٹریڈ ہوتے رہے۔

دریں اثنا، سوئٹزرلینڈ میں امریکی اور ایرانی نمائندوں کے درمیان مذاکرات کا ابتدائی مرحلہ اختتام پذیر ہو گیا۔ ایرانی وزارت خارجہ نے مذاکرات کے نتائج کو حوصلہ افزا قرار دیا، جبکہ قطر اور پاکستان کی جانب سے جاری مشترکہ اعلامیے میں بتایا گیا کہ دونوں ممالک نے آئندہ 60 دن کے اندر جامع معاہدے تک پہنچنے کے لیے ایک متفقہ لائحہ عمل تیار کر لیا ہے۔

مارکیٹ ماہر ایڈورڈ میر کا کہنا ہے کہ بین الاقوامی سیاسی صورتحال تیزی سے تبدیل ہو رہی ہے اور فی الحال سونے کی مارکیٹ پر جغرافیائی کشیدگی اور سفارتی پیش رفت کے اثرات نمایاں ہیں، جس کے باعث سرمایہ کار محتاط حکمت عملی اختیار کر رہے ہیں۔

دوسری طرف امریکی مرکزی بینک فیڈرل ریزرو کی جانب سے سخت مالیاتی پالیسی برقرار رکھنے کے اشاروں نے بھی سونے کی مارکیٹ کو متاثر کیا ہے۔ فیڈ چیئرمین کیون وارش کی جانب سے مہنگائی کے خطرات پر زور دیے جانے کے بعد شرح سود میں اضافے کی توقعات مزید مضبوط ہو گئی ہیں۔

دستیاب اعداد و شمار کے مطابق فیڈ کے 19 پالیسی سازوں میں سے 9 رواں سال شرح سود میں اضافے کے حامی ہیں، جبکہ دسمبر میں شرح سود بڑھائے جانے کے امکانات 89 فیصد تک پہنچ چکے ہیں۔

ماہرین کا کہنا ہے کہ بلند شرح سود سونے کی کشش کو کم کر دیتی ہے کیونکہ یہ ایسی سرمایہ کاری ہے جس پر کسی قسم کا منافع یا سود حاصل نہیں ہوتا۔

دیگر قیمتی دھاتوں کی بات کی جائے تو چاندی 2 فیصد اضافے کے ساتھ 66.18 ڈالر فی اونس تک پہنچ گئی، جبکہ پلاٹینم 0.4 فیصد اضافے کے بعد 1,670.74 ڈالر فی اونس اور پیلیڈیم 1 فیصد اضافے کے ساتھ 1,270.41 ڈالر فی اونس پر جا پہنچا۔