وزیراعظم شہباز شریف نے روبوٹکس اور خودکار نظام کی نمائش کا افتتاح کردیا

اسلام آباد: وزیراعظم شہباز شریف نے اسلام آباد میں انڈس روبوٹکس اینڈ آٹونومس سسٹمز ایکسپو 2026 کا افتتاح کر دیا۔ اس موقع پر انہوں نے کہا کہ یہ نمائش پاکستان کے اس عزم کی نمائندگی کرتی ہے کہ ملک 21ویں صدی میں ترقی کا رخ متعین کرنے والی جدید ٹیکنالوجیز میں اپنا اہم کردار ادا کرے گا۔

افتتاحی تقریب سے خطاب کرتے ہوئے وزیراعظم نے کہا کہ روبوٹکس اور خودکار نظام دنیا کے مختلف شعبوں میں تیزی سے تبدیلیاں لا رہے ہیں، جن میں زراعت کا شعبہ بھی شامل ہے۔ ان ٹیکنالوجیز کے ذریعے کسان فصلوں کی صحت کا بہتر اندازہ لگا سکتے ہیں، پانی، کھاد اور زرعی ادویات کے استعمال کو مؤثر بنا سکتے ہیں جبکہ موسمیاتی تبدیلیوں کے اثرات کا زیادہ بہتر انداز میں مقابلہ کیا جا سکتا ہے۔

انہوں نے کہا کہ جدید خودکار ٹیکنالوجی قدرتی آفات سے نمٹنے میں بھی مددگار ثابت ہو سکتی ہے، کیونکہ اس کے ذریعے متاثرہ علاقوں تک رسائی، امدادی کارروائیوں اور ریسکیو آپریشنز کو مزید مؤثر بنایا جا سکتا ہے۔

وزیراعظم نے کہا کہ پاکستان نے مقامی سطح پر جدید ٹیکنالوجی کی تیاری میں قابل ذکر پیش رفت کی ہے، خاص طور پر دفاع اور سیکیورٹی کے شعبوں میں خودکار نظام کے حوالے سے ملک نے نمایاں صلاحیت حاصل کی ہے۔

شہباز شریف نے کہا کہ فیلڈ مارشل سید عاصم منیر کی قیادت میں مسلح افواج نے ملکی سطح پر تیار کی جانے والی جدید ٹیکنالوجیز کو کامیابی سے بروئے کار لایا ہے۔

انہوں نے بتایا کہ پاکستان میں کئی جدید تربیتی سمیولیٹرز کی تیاری اور اسمبلنگ کا عمل مکمل طور پر مقامی سطح پر جاری ہے، جبکہ ڈرون ٹیکنالوجی میں مقامی شمولیت 60 فیصد سے زائد ہو چکی ہے۔

وزیراعظم نے ملک کے سائنسدانوں، انجینئرز، ماہرین اور تکنیکی شعبے سے وابستہ افراد کی کاوشوں کو خراج تحسین پیش کرتے ہوئے کہا کہ ان کی محنت سے پاکستان کی ٹیکنالوجی کے میدان میں صلاحیتیں مضبوط ہو رہی ہیں۔

معرکہ حق کا ذکر کرتے ہوئے وزیراعظم نے کہا کہ عالمی سطح پر پاکستان کے جدید خودکار نظاموں کے مؤثر استعمال کو دیکھا گیا، جن کے ذریعے ملک نے اپنی زمینی اور سائبر سرحدوں کے تحفظ کو یقینی بنایا۔

انہوں نے زور دیا کہ پاکستان کی جامعات، تحقیقی مراکز، صنعتیں، اسٹارٹ اپس اور زرعی شعبہ باہمی تعاون کے ذریعے ایک مضبوط قومی جدت کا نظام تشکیل دیں تاکہ ملک ٹیکنالوجی کے میدان میں مزید آگے بڑھ سکے۔

وزیراعظم نے کہا کہ پاکستان میں تیار ہونے والی ٹیکنالوجیز کو مقامی سطح پر فروغ دینا، قومی ملکیت میں رکھنا اور وقت کے ساتھ مزید بہتر بنانا ضروری ہے۔

انہوں نے کہا کہ روبوٹکس اور خودکار نظاموں کی ترقی کے ثمرات صرف بڑے اداروں تک محدود نہیں رہنے چاہئیں بلکہ کسانوں، چھوٹے کاروباری افراد، خواتین کاروباریوں، نوجوانوں اور پسماندہ طبقات تک بھی پہنچنے چاہئیں۔

شہباز شریف نے خودکار ٹیکنالوجی کے محفوظ استعمال کے لیے واضح ضابطہ کار اور اخلاقی اصول وضع کرنے کی ضرورت پر زور دیا تاکہ یہ نظام محفوظ، شفاف اور انسانی فلاح کے لیے استعمال کیے جا سکیں۔

تقریب کے دوران وزیراعظم نے ٹیکنالوجی اور جدت کے فروغ کے لیے دو اہم اقدامات کا اعلان بھی کیا۔

انہوں نے بتایا کہ حکومت اسپارک اینڈ ایلیویٹ پروگرام شروع کر رہی ہے، جس کا مقصد تحقیقی کام کو جدید ٹیکنالوجی، عالمی معیار کے کاروباری منصوبوں اور روزگار کے مواقع میں تبدیل کرنا ہے۔

وزیراعظم نے پاکستان وینچر فنڈ قائم کرنے کا اعلان بھی کیا، جس کے لیے ابتدائی طور پر 20 ملین ڈالر مختص کیے جائیں گے تاکہ ملک کے ٹیکنالوجی ایکو سسٹم میں سرمایہ کاری کو فروغ دیا جا سکے۔