فلمی پس منظر نہ رکھنے والوں کو خود کو منوانے کے لیے دوگنی مشقت کرنا پڑتی ہے:کریتی سنن

ممبئی: مشہور بھارتی اداکارہ کریتی سنن نے کہا ہے کہ جو فنکار فلمی خاندانوں سے وابستہ نہیں ہوتے، ان کے لیے فلم انڈسٹری میں اپنا مقام حاصل کرنا آسان نہیں ہوتا۔ ان کے بقول، ایسے افراد کو صرف محنت ہی نہیں بلکہ ظاہری خد و خال پر کی جانے والی تنقید کا بھی سامنا کرنا پڑتا ہے۔

معروف ویب سائٹ 'بالی ووڈ ہنگامہ' کو دیے گئے ایک انٹرویو میں کریتی سنن نے اپنے فلمی سفر اور پیشہ ورانہ چیلنجز پر گفتگو کرتے ہوئے بتایا کہ:

"اس انڈسٹری میں کامیابی کے لیے کوئی آسان راستہ نہیں، یہاں ہر قدم پر جدوجہد درپیش ہوتی ہے۔"
انہوں نے کہا کہ شوبز ایک ایسا شعبہ ہے جہاں کوئی بھی کسی پر مہربان نہیں ہوتا، اور بغیر پس منظر کے آنے والے فنکاروں کو ہر پہلو سے خود کو ثابت کرنا پڑتا ہے۔

"مجھے بھی ابتدا میں یہ سننا پڑا کہ تمہارا قد زیادہ ہے، تم بہت پتلی ہو، یا تم میں کچھ کمی ہے۔ ایسے تبصرے حوصلہ توڑ سکتے ہیں، لیکن میں نے خود پر اعتماد برقرار رکھا۔"
کریتی نے نوجوان اداکاروں کو مشورہ دیا کہ وہ ناکامی سے نہ گھبرائیں، کیونکہ شروعات میں انہیں نظر انداز کیا جانا معمول کا حصہ ہوگا۔

"شروع میں کوئی آپ کی بات نہیں سنے گا، مگر اگر آپ مسلسل محنت کرتے رہیں تو ایک دن آپ کی آواز سنی جائے گی۔"
اداکارہ نے اس بات کا بھی انکشاف کیا کہ کئی فلموں میں صرف اس وجہ سے انہیں کاسٹ نہیں کیا گیا کیونکہ ان کا قد مرد اداکار سے زیادہ تھا، جبکہ بعض فلمسازوں کو ان کی جسمانی ساخت یا رنگت پر بھی اعتراض رہا۔

کریتی سنن نے 2014 میں فلم 'ہیروپنتی' سے فلمی دنیا میں قدم رکھا اور دیکھتے ہی دیکھتے کئی ہٹ فلموں کا حصہ بن گئیں۔ وہ نہ صرف اداکاری میں اپنا لوہا منوا چکی ہیں بلکہ اب فلم پروڈکشن کے میدان میں بھی قدم رکھ چکی ہیں۔