بی سی سی آئی نے ایشیا کپ کی ٹرافی کے لیے اے سی سی کو ایک اور خط بھیج دیا

دبئی : بھارتی کرکٹ بورڈ (بی سی سی آئی) نے ایشیا کپ کی ٹرافی کی حوالے سے ایشین کرکٹ کونسل کے صدر محسن نقوی کو ایک اور خط ارسال کر دیا ہے۔ ذرائع کے مطابق، ایشین کرکٹ کونسل نے اس خط کا جواب دیتے ہوئے کہا ہے کہ اگر بی سی سی آئی کو ٹرافی چاہیے، تو وہ اس کے لیے ایک تقریب منعقد کر سکتے ہیں، جہاں وہ ٹرافی وصول کر سکیں گے۔

اے سی سی نے بھارتی بورڈ کو نومبر کے پہلے ہفتے میں دبئی میں اس تقریب کا انعقاد کرنے کی تجویز دی ہے، جس میں ٹرافی بی سی سی آئی کے حوالے کی جائے گی۔ اس بات کی تصدیق کرتے ہوئے ایشین کرکٹ کونسل نے بھارتی بورڈ کو آگاہ کیا کہ ٹرافی دینے کی یہ تقریب دبئی میں ہوگی۔

یاد رہے کہ اس سے پہلے بھی بھارتی کرکٹ بورڈ نے محسن نقوی کو ٹرافی کے حوالے سے خط لکھا تھا، جس کے جواب میں اے سی سی نے کہا تھا کہ بھارتی بورڈ اپنے کسی آفیشل یا کھلاڑی کو ساتھ لے کر دبئی آئے اور وہاں ٹرافی وصول کرے۔