کسانوں کو حق مل رہا ہے، سیاست بند کریں، حالات خراب نہیں ہونے دیں گے: عظمٰی بخاری

لاہور: صوبائی وزیر اطلاعات عظمٰی بخاری نے دوٹوک اعلان کیا ہے کہ پنجاب میں کسانوں کے نام پر سیاست نہیں چلے گی، حکومت کاشتکاروں کے حقوق کا تحفظ کر رہی ہے اور صوبے کا امن خراب کرنے والوں کو برداشت نہیں کیا جائے گا۔

پریس کانفرنس میں انہوں نے بتایا کہ مریم نواز نے گندم کے کاشتکاروں کے لیے بڑا ریلیف پیکج دیا ہے، جس کے تحت 109 ارب روپے دیے جا رہے ہیں۔ ہر کسان کو 5 ہزار روپے فی ایکڑ ملے گا، فلور ملز گندم خریدنے کی پابند ہوں گی۔

انہوں نے کہا کہ سب سے زیادہ پیداوار والے کسانوں کو مہنگے ٹریکٹر انعام میں دیے جائیں گے، اور جو ٹیوب ویل بجلی سے نہیں چلتے، وہ اب سورج کی روشنی سے چلیں گے کیونکہ حکومت 8 ارب کی سبسڈی دے رہی ہے۔

عظمٰی بخاری نے آخر میں کہا کہ پنجاب کے کسانوں کو اکیلا نہیں چھوڑا جائے گا، اور جو ان کے نام پر کھیل کھیل رہے ہیں، انہیں روکنے کے لیے حکومت تیار ہے۔