لاہور کی فضا سموگ سے چھا گئی، شہریوں کو احتیاط کی ہدایت

لاہور: لاہور کی فضا اس وقت دنیا میں سب سے زیادہ آلودہ ہو گئی ہے، اور اس کی وجہ سموگ ہے۔ سموگ مانیٹرنگ سینٹر کے مطابق، آج شہر میں ایئر کوالٹی انڈیکس (اے کیو آئی) 292 تک پہنچ چکا ہے، جو کہ انسانوں کے لیے انتہائی خطرناک ہے۔ اس آلودگی کے باعث حکام نے شہریوں کو مشورہ دیا ہے کہ وہ غیر ضروری طور پر گھروں سے باہر نہ نکلیں۔

صبح کے وقت سردی کی وجہ سے آلودہ ذرات زیادہ دیر تک فضا میں معلق رہیں گے، اور اس کے اثرات زیادہ علاقوں تک پھیل سکتے ہیں۔ اس وقت ان علاقوں میں سموگ گنز کا استعمال کیا جا رہا ہے تاکہ فضائی آلودگی کو کم کیا جا سکے۔

محکمہ موسمیات کے مطابق، لاہور میں بارش کے کوئی امکانات نہیں ہیں، جس سے سموگ میں مزید اضافہ ہو سکتا ہے۔ ماہرین نے شہریوں کو احتیاطی تدابیر اپنانے کی تاکید کی ہے، خاص طور پر بچوں، بزرگوں اور سانس کی بیماریوں کے شکار افراد کو باہر جانے سے گریز کرنے کا کہا گیا ہے۔