راولپنڈی کرپشن کیس: پولیس حراست سے فرار ہونے والا اقبال سنگھیڑا دوبارہ گرفتار

راولپنڈی: راولپنڈی کرپشن کیس کے ملزم سابق اے ڈی سی آر سیالکوٹ اقبال سنگھیڑا کو پولیس نے دوبارہ گرفتار کر لیا ہے۔ ملزم 13 نومبر کو راولپنڈی سے لاہور منتقلی کے دوران پولیس حراست سے فرار ہوگیا تھا۔ پولیس نے خصوصی ٹیمیں تشکیل دے کر اقبال سنگھیڑا کو دوبارہ گرفتار کیا اور اسے کوٹ لکھپت جیل منتقل کر دیا ہے۔

پولیس نے ملزم کی گرفتاری کے لیے تین مختلف ٹیمیں بنائیں، جن کی قیادت ایس پی صدر ڈویژن انعم شیر خان کر رہی تھیں۔ اقبال سنگھیڑا کی گرفتاری کے بعد پولیس نے اس معاملے میں غفلت برتنے والے چار اہلکاروں کو نوکری سے برخاست کر دیا ہے۔ ان اہلکاروں کو عدالت نے جوڈیشل ریمانڈ پر جیل بھیج دیا ہے۔

پولیس نے مزید تحقیقات کرتے ہوئے اہلکاروں کا موبائل ڈیٹا حاصل کر لیا ہے تاکہ یہ پتہ چل سکے کہ وہ ملزمان سے رابطے میں تھے یا نہیں۔ اس کے علاوہ، پولیس اقبال سنگھیڑا کے فرار میں استعمال ہونے والی گاڑی کے بارے میں بھی معلومات حاصل کرنے کی کوشش کر رہی ہے، لیکن گاڑی کا نمبر مکمل نہ ہونے کی وجہ سے رجسٹریشن کی تفصیلات میں مشکلات پیش آ رہی ہیں۔ اس سلسلے میں ایکسائز دفاتر اور این ایچ اے کو مراسلہ بھیجا گیا ہے تاکہ ٹول پلازہ سے گزری گاڑی کی معلومات حاصل کی جا سکیں۔

اقبال سنگھیڑا کے فرار کے بعد اس کے بھائی سمیت 6 نامعلوم افراد اور 4 پولیس اہلکاروں کے خلاف مقدمہ درج کیا گیا تھا۔