ملک بھر میں خشک اور سرد موسم رہے گا

اسلام آباد: محکمہ موسمیات نے کہا ہے کہ ملک کے بیشتر حصوں میں اگلے چند دنوں تک موسم خشک اور سرد رہے گا، جبکہ پہاڑی علاقوں میں سردی کی شدت مزید بڑھ سکتی ہے۔

محکمہ موسمیات کے مطابق، ملک کے بیشتر علاقوں میں خشک موسم رہے گا اور صبح و رات کے وقت سردی میں اضافہ ہو سکتا ہے۔ پنجاب کے میدانی علاقوں میں اسموگ کے ساتھ ہلکی دھند بھی پڑنے کا امکان ہے۔

گزشتہ 24 گھنٹوں کے دوران بھی ملک کے زیادہ تر حصوں میں موسم خشک رہا، جبکہ پہاڑی علاقوں میں سردی کا سلسلہ جاری رہا۔ پنجاب کے چند علاقوں میں ہلکی دھند دیکھی گئی۔

اسکردو میں کم سے کم درجہ حرارت منفی 6 ڈگری سینٹی گریڈ ریکارڈ کیا گیا، اور آج پشاور میں درجہ حرارت 5 ڈگری سینٹی گریڈ تک گرنے کا امکان ہے۔ صوبہ خیبر پختونخوا کے بالائی علاقوں میں شدید سردی رہے گی۔

دوسری طرف، لاہور شہر کی فضائی آلودگی کی سطح انتہائی خطرناک ہو گئی ہے، جہاں ایئر کوالٹی انڈیکس 233 ریکارڈ کیا گیا ہے۔ لاہور میں زیادہ سے زیادہ درجہ حرارت 25 ڈگری سینٹی گریڈ تک رہنے کا امکان ہے۔