لیجنڈ اداکار محمد علی کو مداحوں سے جدا ہوئے 19 برس ہوگئے

لاہور : پاکستان کے معروف اور بے مثال اداکار محمد علی کو مداحوں سے جدا ہوئے 19 برس بیت گئے ہیں۔ محمد علی 19 اپریل 1931 کو بھارت کے شہر رامپور میں پیدا ہوئے، اور 1947 میں ہونے والی تقسیم کے بعد اپنے خاندان کے ہمراہ کراچی منتقل ہوگئے تھے۔

انہوں نے 1956 میں ریڈیو پاکستان حیدرآباد سے اپنے کیریئر کا آغاز کیا اور بعد میں کراچی میں ریڈیو پاکستان کے اسٹیشن میں کام کرنے لگے، جہاں ان کی اداکاری کو سرپرستی حاصل ہوئی۔ ان کا انداز بہت منفرد تھا، اور وہ اپنے کردار میں اس قدر ڈوب جاتے کہ ان کی اداکاری میں حقیقت کا رنگ نظر آتا تھا۔

محمد علی نے فلم چراغ جلتا رہا سے اپنے کیریئر کا آغاز کیا اور پھر ایک کے بعد ایک کامیاب فلموں میں اپنی اداکاری کے جوہر دکھائے۔ ان کی جوڑی اداکارہ زیبا کے ساتھ بے حد کامیاب ہوئی، اور یہ جوڑی شائقین میں بہت پسند کی گئی۔ دونوں کی محبت اور رشتہ بعد میں حقیقی زندگی میں بھی بندھ گیا۔

محمد علی نے آگ کا دریا، انسان اور آدمی، آئینہ اور صاعقہ جیسے درجنوں فلموں میں اپنی شاندار اداکاری سے فلمی صنعت کو ایک نئی جہت دی۔ انہیں اپنے کام کی بدولت تمغہ امتیاز اور تمغہ حسنِ کارکردگی جیسے بڑے اعزازات بھی ملے۔ محمد علی 19 مارچ 2006 کو دنیا سے رخصت ہو گئے، لیکن ان کی اداکاری کا انوکھا انداز آج بھی شائقین کے دلوں میں زندہ ہے۔