گوگل کی سرچ پیج پر نئی تبدیلی : پلس بٹن اور اے آئی فیچر کا اضافہ

کیلیفورنیا : گوگل نے اپنے سرچ انجن کے ہوم پیج پر ایک دلچسپ تبدیلی کی ہے، جو صارفین کے لیے ایک نیا تجربہ پیش کرتا ہے۔ گوگل عام طور پر اپنے سرچ پیج میں تبدیلیاں کم ہی کرتا ہے، تو جب ایسا کچھ ہوتا ہے تو وہ واقعی اہمیت رکھتا ہے۔

اب سرچ بار میں ایک نیا پلس (+) بٹن نظر آئے گا، جو کہ جنریٹیو آرٹیفیشل انٹیلی جنس (اے آئی) ٹیکنالوجی پر مبنی ہے۔ اس کا مقصد یہ ہے کہ آپ اگر چاہیں تو گوگل کو آپ کی فائل یا تصویر کی وضاحت کرنے کا کہیں، اور گوگل آپ کو اُس فائل کا تجزیہ کرکے اس کے بارے میں تفصیل سے معلومات فراہم کرے۔

جب آپ اس پلس بٹن پر کلک کریں گے تو ایک مینو کھلے گا، جس میں آپ کو "اپ لوڈ امیج" اور "اپ لوڈ فائل" کے آپشنز ملیں گے۔ ان میں سے کوئی بھی آپشن منتخب کرنے پر گوگل کا اے آئی موڈ شروع ہو جائے گا، جو آپ کی فائل کا تجزیہ کرے گا اور آپ کو اس کا خلاصہ، وضاحت یا سوالات کے جوابات دے گا۔

یہ نیا فیچر گوگل کے لیے بالکل نیا نہیں ہے کیونکہ پہلے بھی گوگل میں فائلز اور تصاویر کے لیے اے آئی موڈ موجود تھا، لیکن اس بار یہ عمل بہت آسان اور تیز بنا دیا گیا ہے۔ گوگل کا مقصد یہ ہے کہ سرچ کا تجربہ صرف سوالات تک محدود نہ ہو، بلکہ اسے ایک انٹرایکٹو اور ذاتی نوعیت کا تجربہ بنایا جائے۔

یہ تبدیلی اس وقت صرف ڈیسک ٹاپ کمپیوٹرز پر دستیاب ہے، اور انکوگنیٹو موڈ میں بھی اسے استعمال کیا جا سکتا ہے۔ تاہم، ابھی یہ فیچر موبائل براؤزرز پر متعارف نہیں کرایا گیا۔