ڈونلڈ ٹرمپ کی ایران کو یمن میں حوثیوں کی کارروائیوں کا ذمہ دار ٹھہرانے کی دھمکی

واشنگٹن  : امریکی صدر ڈونلڈ ٹرمپ نے یمن میں حوثیوں کی کارروائیوں کا الزام ایران پر عائد کیا ہے اور ایران کو سنگین نتائج کی دھمکی دی ہے۔ سوشل میڈیا پر جاری اپنے بیان میں ٹرمپ نے کہا کہ ایران یمن کے حوثیوں کی تمام کارروائیوں کا ذمہ دار ہے اور انہیں ان حملوں کا جواب دینا پڑے گا۔

انہوں نے مزید کہا کہ "یمن میں حوثیوں کی ہر گولی کا ذمہ دار ایران ہے" اور یہ بھی کہا کہ "حوثی ایران کی پیداوار ہیں اور ہم انہیں اب ختم کر دیں گے۔" ٹرمپ نے ایران پر یہ الزام بھی عائد کیا کہ وہ حوثیوں کو اسلحہ فراہم کرتا ہے اور ان کی عسکری کارروائیوں کی مدد کرتا ہے، جس سے جنگ میں شدت آ رہی ہے۔

امریکی صدر نے یہ بھی کہا کہ ایران جنگ کو بڑھاوا دے رہا ہے اور متاثرین کو اپنی مظلومیت دکھا کر عالمی سطح پر حمایت حاصل کرنے کی کوشش کر رہا ہے۔ اس بیان کے بعد، امریکہ کی جانب سے یمن میں حوثیوں پر فضائی حملے کیے گئے تھے جس میں 50 سے زائد افراد ہلاک ہوگئے، جن میں خواتین اور بچے بھی شامل تھے۔ حوثیوں نے اس پر ردعمل دیتے ہوئے امریکہ کو بدلے کی دھمکی دی ہے اور کہا ہے کہ امریکا کو جوابی کارروائی کے لیے تیار رہنا چاہیے۔