ملک بھر میں شدید گرمی، کچھ علاقوں میں بارش کا امکان

اسلام آباد: محکمہ موسمیات نے خبردار کیا ہے کہ ملک کے زیادہ تر علاقوں میں گرمی کی شدید لہر جاری رہے گی، جبکہ چند بالائی اور پہاڑی علاقوں میں ہلکی بارش کا بھی امکان ہے۔ گرمی کی یہ لہر 21 جون تک برقرار رہنے کی پیشگوئی کی گئی ہے۔

محکمہ موسمیات کے مطابق آج ملک کے میدانی علاقے شدید گرمی اور خشک موسم کی لپیٹ میں رہیں گے۔ اسلام آباد اور آس پاس کے علاقوں میں مطلع جزوی ابر آلود رہے گا، اور کہیں کہیں گرج چمک کے ساتھ بارش ہو سکتی ہے۔

خیبر پختونخوا میں بھی بادل چھائے رہنے کی توقع ہے، خاص طور پر شام اور رات کے وقت چترال، دیر، سوات، مالاکنڈ، شانگلہ اور ایبٹ آباد میں بارش کا امکان ہے۔

پنجاب کے زیادہ تر اضلاع میں موسم گرم رہے گا، تاہم مری، گلیات، اٹک، چکوال، جہلم اور راولپنڈی کے کچھ حصوں میں ہلکی پھوار پڑنے کی امید ہے۔

سندھ اور بلوچستان کے بیشتر علاقوں میں بھی گرمی اور نمی کا زور برقرار رہے گا، لیکن کوئٹہ، خضدار اور لسبیلہ جیسے علاقوں میں ہواؤں کے ساتھ بارش ہو سکتی ہے۔

آزاد کشمیر اور ملحقہ پہاڑی علاقوں میں بھی کچھ مقامات پر گرج چمک کے ساتھ بارش کی پیشگوئی کی گئی ہے۔

محکمہ موسمیات نے شہریوں کو مشورہ دیا ہے کہ شدید گرمی سے بچنے کے لیے احتیاط کریں، خاص طور پر دن کے اوقات میں دھوپ سے بچیں، پانی کا زیادہ استعمال کریں اور ضروری نہ ہو تو باہر نکلنے سے گریز کریں۔