لاہور میں موسم نے کروٹ بدل لی، ٹھنڈی ہواؤں اور بادلوں کا راج ۔۔۔۔بارش کی پیش گوئی

لاہور: صوبائی دارالحکومت میں صبح سویرے موسم نے خوشگوار رخ اختیار کر لیا۔ بادلوں نے آسمان کو گھیرے میں لے لیا جبکہ ٹھنڈی ہواؤں نے گرمی اور حبس کا زور کم کر دیا، جس سے شہریوں نے قدرے سکون کا احساس کیا۔

محکمہ موسمیات کے مطابق آئندہ 24 گھنٹوں کے دوران لاہور میں بارش کا امکان ہے۔ رپورٹ کے مطابق بعض مقامات پر گرج چمک کے ساتھ ہلکی سے درمیانی شدت کی بارش متوقع ہے۔

محکمہ موسمیات کا کہنا ہے کہ موسم میں یہ تبدیلی عارضی ہے، تاہم آئندہ چند روز تک وقفے وقفے سے بارش کا سلسلہ جاری رہ سکتا ہے۔ شہریوں کو مشورہ دیا گیا ہے کہ وہ سفر کے دوران احتیاطی تدابیر اختیار کریں اور موسم کی صورتحال سے باخبر رہیں۔

ادھر، ضلعی انتظامیہ نے نشیبی علاقوں میں ممکنہ نکاسی آب کے مسائل سے نمٹنے کے لیے متعلقہ اداروں کو الرٹ کر دیا ہے۔