اجتماعی کوششوں سے معیشت کو استحکام ملا، اب ترقی کی طرف بڑھ رہے ہیں ، وزیراعظم شہباز شریف

اسلام آباد : وزیراعظم شہباز شریف نے کہا ہے کہ ملک کی معیشت اب بہتر ہو رہی ہے، اور یہ سب اجتماعی محنت اور کوششوں کا نتیجہ ہے۔ ان کا کہنا تھا کہ انشاء اللہ اب پاکستان ترقی اور خوشحالی کی راہ پر چل پڑا ہے۔

وہ اسلام آباد میں جناح اسکوائر مری روڈ انڈر پاس کا سنگ بنیاد رکھنے کی تقریب سے خطاب کر رہے تھے۔ وزیراعظم نے بتایا کہ اسلام آباد میں کئی بڑے منصوبے جاری ہیں جن سے نہ صرف شہر خوبصورت بن رہا ہے بلکہ ٹریفک کا نظام بھی بہتر ہو رہا ہے۔

شہباز شریف نے وزیراعلیٰ محسن نقوی کی تعریف کرتے ہوئے کہا کہ انہوں نے اس انڈر پاس کو 60 دن کے بجائے 35 دن میں مکمل کرنے کا وعدہ کیا ہے، اور وہ اس پر بھروسہ بھی کرتے ہیں۔ وزیراعظم نے کہا کہ اب انہیں  "پاکستان سپیڈ" کہا جائے گا۔

انہوں نے بلوچستان کے حوالے سے کہا کہ وہاں کا خونی ٹریک اب محفوظ ہائی وے میں تبدیل کیا جا رہا ہے، جو ایک بڑا تحفہ ہوگا۔ ساتھ ہی بتایا کہ این ایف سی میں بلوچستان کا حصہ دُگنا کر دیا گیا ہے تاکہ وہاں کے عوام کو بہتر سہولیات مل سکیں۔ شہباز شریف نے زور دیا کہ پاکستان کی ترقی سب صوبوں کو ساتھ لے کر چلنے سے ہی ممکن ہے، اور یہی حکومت اور فوج کا وژن بھی ہے۔

تقریب میں محسن نقوی نے کہا کہ اسلام آباد میں ٹریفک کے مسائل کے حل کے لیے تیزی سے کام کیا جا رہا ہے۔ ان کا کہنا تھا کہ بلیو ایریا میں بند پارکنگ پلازہ پر بھی کام شروع ہو گیا ہے، اور دیگر چوک پوائنٹس پر بھی جلد بہتری نظر آئے گی۔ وزیر داخلہ نے کہا کہ اسلام آباد میں رش اور کمرشل سرگرمیوں میں اضافہ ہو رہا ہے، اس لیے پارکنگ اور ٹریفک کی بحالی کے لیے مزید منصوبے لائے جا رہے ہیں۔