چینی کی قیمتوں میں مزید اضافہ، اگلے ماہ 200 روپے فی کلو تک پہنچنے کا امکان

اسلام آباد : حکومت کے تمام دعووں کے باوجود ملک بھر میں چینی کی قیمتوں میں مسلسل اضافہ دیکھنے کو مل رہا ہے۔ وفاقی ادارہ شماریات کی تازہ رپورٹ کے مطابق، چینی کی اوسط قیمت 3 روپے 38 پیسے فی کلو کے اضافے کے بعد 175 روپے 19 پیسے فی کلو تک پہنچ گئی ہے۔

رپورٹ میں بتایا گیا کہ چینی کی سب سے زیادہ قیمت 185 روپے فی کلو تک پہنچ چکی ہے، اور پشاور میں چینی کی قیمتوں نے دیگر شہروں کو پیچھے چھوڑتے ہوئے سب سے مہنگی چینی فروخت کی جا رہی ہے۔ پشاور میں چینی کی قیمت میں ایک ہفتے کے دوران 5 روپے فی کلو کا اضافہ ہوا۔

اوسط قیمت: 175 روپے 19 پیسے فی کلو
پچھلے ہفتے: 171 روپے 81 پیسے فی کلو
ایک سال پہلے کی قیمت: 143 روپے 75 پیسے فی کلو
زیادہ سے زیادہ قیمت: 185 روپے فی کلو

پشاور کے شہریوں کو چینی کی قیمتوں میں اضافے کے باعث مشکلات کا سامنا ہے، جہاں چینی کی قیمت نے پورے ملک کو پیچھے چھوڑ دیا ہے۔ پشاور میں چینی کی قیمتوں میں حالیہ ہفتے میں 5 روپے فی کلو کا اضافہ ریکارڈ کیا گیا ہے۔

عبدالرؤف ابراہیم، چیئرمین ہول سیل گروسرز ایسوسی ایشن نے کہا ہے کہ اگر چینی کی قیمتوں پر قابو نہ پایا گیا تو اس کی قیمت 200 روپے فی کلو تک جا سکتی ہے۔ انہوں نے مزید کہا کہ چینی کی ایکس مل قیمت 168 روپے فی کلو ہے، جبکہ وفاق نے ریٹیل قیمت 164 روپے مقرر کی تھی، مگر حکومتی قیمتوں پر عمل درآمد نظر نہیں آ رہا۔ ان کا کہنا تھا کہ حکومت کو عوام کو مہنگائی سے بچانے کے لیے فوری اقدامات کرنا ہوں گے۔