ہماچل پردیش میں مون سون بارشوں نے تباہی مچا دی، 106 افراد ہلاک

شملہ : بھارتی ریاست ہماچل پردیش میں مون سون کی بارشوں نے زبردست تباہی مچائی ہے۔ ریاستی ڈیزاسٹر مینجمنٹ اتھارٹی کے مطابق 20 جون سے 15 جولائی تک جاری بارشوں کی وجہ سے اب تک 106 افراد اپنی جانیں کھو چکے ہیں۔

ان میں سے 62 افراد لینڈسلائیڈنگ، سیلاب، کلاؤڈ برسٹ، اور کرنٹ لگنے جیسے قدرتی حادثات میں ہلاک ہوئے جبکہ باقی 44 افراد سڑک حادثات میں جاں بحق ہوئے ہیں۔

بارشوں نے صرف جانوں کا نقصان نہیں کیا بلکہ املاک کو بھی شدید نقصان پہنچایا ہے۔ تقریباً 293 پکے اور 91 کچے مکانات مکمل طور پر تباہ ہو چکے ہیں، جبکہ 850 ایکڑ زرعی زمین بھی متاثر ہوئی ہے۔

اس کے علاوہ سرکاری املاک کو 81 کروڑ روپے سے زائد کا نقصان پہنچا ہے، جس میں سڑکیں، بجلی، پانی کی فراہمی اور صحت و تعلیم کی عمارتیں شامل ہیں۔

ڈیزاسٹر مینجمنٹ حکام نے عوام سے اپیل کی ہے کہ وہ آئندہ بارشوں کے دوران محتاط رہیں اور حفاظتی ہدایات پر عمل کریں تاکہ مزید جانی و مالی نقصان سے بچا جا سکے۔