پاک فوج کی جوابی کارروائی کے بعد افغان طالبان کی جنگ بندی کی درخواست

چمن :  چمن کے سپن بولدک سیکٹر میں پاک فوج کی بھرپور جوابی کارروائی کے بعد افغان طالبان نے جنگ بندی کی درخواست کر دی ہے۔ سکیورٹی ذرائع کے مطابق پاک فوج نے افغان طالبان اور فتنہ الخوارج کی طرف سے سوشل میڈیا پر پھیلائی جانے والی جھوٹی ویڈیوز کو مسترد کر دیا ہے، جن میں دعویٰ کیا گیا تھا کہ پاک فوج نے طالبان کے ہتھیار قبضے میں لے لیے ہیں۔

ذرائع کے مطابق پاک فوج نے افغان طالبان کی جارحیت کا سخت جواب دیا، جس میں طالبان کی مختلف پوسٹوں، ٹینکوں اور دیگر فوجی اہداف کو نشانہ بنایا گیا۔ اس کارروائی کے نتیجے میں طالبان کے متعدد فوجی مقامات کو نقصان پہنچا۔

پاک فوج کی جانب سے واضح کیا گیا ہے کہ وہ افغان طالبان اور فتنہ الخوارج کی کسی بھی جارحیت کا سخت جواب دینے کے لیے تیار ہے، اور اگر مزید حملے کیے گئے تو ان کا جواب پہلے سے بھی زیادہ شدید ہو سکتا ہے۔

افغان طالبان کی طرف سے فائر بندی کی درخواست کے بعد علاقے میں عارضی سکون آیا ہے، لیکن ماہرین کا کہنا ہے کہ صورتحال ابھی غیر مستحکم ہے اور دونوں طرف کی افواج میں کشیدگی باقی رہ سکتی ہے۔ پاک فوج کا پیغام واضح ہے کہ وہ اپنی سرحدوں کی حفاظت کے لیے کسی بھی سطح پر لڑنے کے لیے تیار ہے۔