تاجکستان کے وزیر دفاع کا جی ایچ کیو راولپنڈی کا دورہ، دفاعی تعاون بڑھانے پر اتفاق

راولپنڈی: تاجکستان کے وزیر دفاع کرنل جنرل صابرزادہ امام علی عبداللہ رحیم نے جی ایچ کیو راولپنڈی کا دورہ کیا اور پاک فوج کے سربراہ فیلڈ مارشل سید عاصم منیر سے ملاقات کی۔

اس ملاقات میں دونوں رہنماؤں نے باہمی دلچسپی کے امور، علاقائی سلامتی اور دونوں ممالک کے درمیان دفاعی تعاون پر تفصیل سے بات کی۔ دونوں ممالک نے اپنے فوجی تعلقات کو مزید مستحکم کرنے کے عزم کا اعادہ کیا۔

آئی ایس پی آر کے مطابق، ملاقات میں فوجی تربیت، دہشت گردی کے خلاف تعاون اور علاقائی امن و استحکام کے مسائل پر بھی اتفاق کیا گیا۔ تاجک وزیر دفاع نے پاکستانی فوج کی پیشہ ورانہ صلاحیتوں اور خطے میں امن کے لیے اس کے کردار کو سراہا۔ انہوں نے کہا کہ پاکستان کی افواج نے خطے میں امن کے قیام کے لیے قابلِ ذکر کردار ادا کیا ہے۔

فیلڈ مارشل سید عاصم منیر نے اس موقع پر کہا کہ پاکستان تاجکستان کے ساتھ دفاعی اور سلامتی کے شعبوں میں تعاون مزید بڑھانے کے لیے پرعزم ہے تاکہ خطے میں امن و خوشحالی کو فروغ دیا جا سکے۔