جدید تہذیب کا خاموش بحران

عصرِ حاضر کی مادی تہذیب نے انسانی ارتقا، معاشی فراوانی، سائنسی انکشافات اور تکنیکی تسلط کے ایسے پ±رشکوہ بیانیے تشکیل دیے ہیں جن سے یہ گمان پیدا ہوتا ہے کہ ترقی یافتہ اقوام نے امنِ عامہ، استحکامِ معاشرہ اور حکمرانیِ قانون کے وہ معیارات حاصل کر لیے ہیں جو انسانی تاریخ کی معراج تصور کیے جا سکتے ہیں۔ تاہم جب ان معاشروں کے داخلی احوال، تہذیبی ساخت اور سماجی نفسیات کا غیر جانب دارانہ اور عمیق مطالعہ کیا جائے تو یہ حقیقت آشکار ہوتی ہے کہ مادی خوشحالی اور علمی پیش رفت، فی نفسہ، نہ تو اخلاقی تحفظ کی ضمانت ہیں اور نہ ہی اجتماعی سکون و اطمینان کا مستقل سرچشمہ۔ بسا اوقات ترقی کی خیرہ کن تابانی کے پس منظر میں ایسے خاموش مگر مہلک بحران پروان چڑھ رہے ہوتے ہیں جو معاشرتی ڈھانچوں کی بنیادوں کو اندر ہی اندر دیمک کی مانند چاٹنے لگتے ہیں۔
برطانیہ، جو مدتِ دراز سے جمہوری روایات، قانون پسندی اور شہری نظم و ضبط کی علامت کے طور پر پیش کیا جاتا رہا ہے، آج جرائم کے بڑھتے ہوئے رجحانات کے سبب سنجیدہ فکری مباحث کا موضوع بنتا جا رہا ہے۔ متعدد بین الاقوامی مطالعات اور تقابلی تحقیقی جائزوں سے یہ امر مترشح ہوا ہے کہ ترقی یافتہ دنیا کے دیگر ممالک کے مقابلے میں برطانوی شہریوں کو گاڑیوں کی چوری، رہائشی املاک میں نقب زنی، پ±رتشدد جرائم، جنسی تعدیات اور شاہراہوں پر وقوع پذیر ہونے والی وارداتوں کا سامنا نسبتاً زیادہ کرنا پڑ رہا ہے۔ یہ صورتِ حال محض شماریاتی بے ترتیبی نہیں بلکہ اس گہرے سماجی اضطراب کی مظہر ہے جس میں ریاستی ادارے، معاشرتی اقدار اور انسانی رویے ایک پیچیدہ آزمائش سے دوچار دکھائی دیتے ہیں۔
یہ امر بھی توجہ طلب ہے کہ برطانیہ میں قانون نافذ کرنے والے ادارے نہ تو کمزور شمار ہوتے ہیں اور نہ ہی ریاستی نگرانی کا نظام ناقص قرار دیا جا سکتا ہے۔ جدید نگرانی کے آلات، سی سی ٹی وی کیمروں کا وسیع جال، حفاظتی الارموں کی کثرت اور گھریلو تحفظ کے متعدد انتظامات اس امر کی غمازی کرتے ہیں کہ تحفظِ عامہ کے لیے خاطر خواہ وسائل بروئے کار لائے جا رہے ہیں۔ اس کے باوجود جرائم کی افزوں شرح اس حقیقت کی نشان دہی کرتی ہے کہ جرم کو محض انتظامی یا پولیسنگ کے تناظر میں سمجھنا ناکافی ہے؛ اس کے پس منظر میں تہذیبی اضطراب، نفسیاتی بے سمتی اور معاشرتی انحطاط کے متعدد عوامل بھی کارفرما ہوتے ہیں۔
سماجی علوم کے ماہرین اس صورتِ حال کی تشریح کرتے ہوئے جن عوامل کی نشاندہی کرتے ہیں، ان میں سب سے نمایاں غیر معمولی دولت کے حصول کی وہ بے تاب خواہش ہے جو تدریجی ارتقا، محنت مسلسل اور جائز ذرائع کے بجائے فوری کامیابی اور برق رفتار خوشحالی کے تصورات کو فروغ دیتی ہے۔ جدید سرمایہ دارانہ معاشروں میں کامیابی کی تعریف اکثر و بیشتر مادی اثاثوں، مالی حیثیت اور ظاہری آسائشوں کے گرد گھومتی ہے، جس کے نتیجے میں ایسے افراد کی تعداد بڑھنے لگتی ہے جو مطلوبہ معیارِ زندگی تک رسائی نہ ہونے کی صورت میں قانون شکنی اور غیر قانونی ذرائع کو اختیار کرنے میں تامل محسوس نہیں کرتے۔
اس کے ساتھ خاندانی نظام کی تدریجی کمزوری، سماجی رشتوں کی تحلیل، بڑھتی ہوئی انفرادیت، نفسیاتی دباو¿، معاشی غیر یقینی اور شہری زندگی کی بے چہرہ ہجومیت بھی جرائم کے فروغ میں اہم کردار ادا کرتی ہے۔ جب فرد اپنی اجتماعی شناخت سے محروم ہو کر محض ایک تنہا اکائی میں تبدیل ہو جائے تو قانون، اخلاق اور معاشرتی ذمہ داری کے ساتھ اس کا تعلق بھی کمزور پڑنے لگتا ہے۔ اسی لیے جرائم کے مسئلے کو صرف قانونی زاویے سے دیکھنا حقیقت کے ایک محدود حصے کو سمجھنے کے مترادف ہے۔
برطانوی حکومتی حلقوں کے بعض ذمہ داران کی جانب سے یہ اعتراف بھی سامنے آیا ہے کہ جرائم کی ایک قابلِ ذکر مقدار چند مخصوص عادی مجرموں، منظم جرائم پیشہ نیٹ ورکس اور منشیات کے عادی عناصر کے گرد مرکوز ہے۔ یہی وجہ ہے کہ خصوصی عدالتوں، سخت تر قانونی اقدامات اور نگرانی کے جدید طریقہ کار کو فروغ دینے کی کوششیں کی جا رہی ہیں۔ تاہم تاریخی تجربات اس امر پر شاہد ہیں کہ محض تعزیری شدت اور سزا کا خوف کسی معاشرے سے جرائم کا مکمل خاتمہ نہیں کر سکتا، جب تک ان اسباب و محرکات کا تدارک نہ کیا جائے جو جرم کو جنم دیتے اور اس کی افزائش کا موجب بنتے ہیں۔
پولیس کے وسائل، افرادی قوت اور انتظامی استعداد کا مسئلہ بھی اس تناظر میں غیر معمولی اہمیت رکھتا ہے۔ جب ایک پولیس اہلکار کے دائرہ نگرانی میں ہزاروں افراد، سینکڑوں عمارات، وسیع شاہراہیں اور بے شمار عوامی مقامات شامل ہوں تو مو¿ثر نگرانی اور بروقت مداخلت ایک دشوار ہدف بن جاتی ہے۔ یہی سبب ہے کہ جدید ریاستوں میں بھی عوام کے اندر یہ تاثر پایا جاتا ہے کہ ریاست اکثر جرم کے وقوع پذیر ہونے کے بعد متحرک ہوتی ہے، اس سے قبل نہیں۔ چنانچہ عصرِ حاضر کی پولیسنگ کا بنیادی چیلنج یہی ہے کہ وہ محض ردِعمل کا ادارہ نہ رہے بلکہ جرم کی پیش بندی اور روک تھام کا مو¿ثر ذریعہ بھی بن سکے۔
لندن جیسے عالمی اور کثیرالثقافتی شہر کے حوالے سے بڑھتے ہوئے سٹریٹ کرائم اور راہ زنی کے واقعات مغربی دنیا کے لیے ایک سنجیدہ تنبیہ کی حیثیت رکھتے ہیں۔ یہ صورتحال اس حقیقت کو نمایاں کرتی ہے کہ بلند و بالا عمارتیں، جدید مواصلاتی نظام، ترقی یافتہ ٹرانسپورٹ اور سائنسی سہولیات کسی معاشرے کو ازخود محفوظ نہیں بنا سکتیں، جب تک اس کی اخلاقی، سماجی اور تہذیبی اساس مستحکم نہ ہو۔
حقیقت یہ ہے کہ اقوام کی اصل قوت محض اقتصادی اشاریوں، مالیاتی حجم یا تکنیکی برتری میں مضمر نہیں ہوتی بلکہ وہ سماجی اعتماد، اخلاقی استحکام، خاندانی یکجہتی اور قانون کے احترام جیسے عناصر میں پنہاں ہوتی ہے۔ جب یہ بنیادیں متزلزل ہونے لگیں تو ترقی کے فلک بوس مینار بھی عدم تحفظ کے سائے میں ڈھکنے لگتے ہیں۔ یہی سبب ہے کہ جرائم جیسے پیچیدہ مسئلے پر گفتگو کرتے ہوئے جذباتی نعروں، نظریاتی تعصبات اور سطحی تجزیوں کے بجائے دلیل، تحقیق اور معروضیت کو رہنما اصول بنانا ناگزیر ہے۔ کیونکہ تاریخ کا غیر متبدل سبق یہی ہے کہ مسائل کا پائیدار حل خواہشات اور تصورات سے نہیں بلکہ حقائق کے ادراک، دانشمندانہ حکمتِ عملی اور اجتماعی بصیرت سے جنم لیتا ہے، اور جو معاشرے اس اصول کو نظرانداز کر دیتے ہیں، وہ اپنی تمام تر مادی ترقی کے باوجود داخلی اضطراب، سماجی بے یقینی اور تہذیبی عدم استحکام کا شکار ہو جاتے ہیں۔