پاکستان میں گوگل کی جدید AI اشتہاراتی سہولت کا آغاز

اسلام آباد : گوگل اپنی جدید مصنوعی ذہانت (AI) پر مبنی اشتہاری سہولت جلد ہی پاکستان میں متعارف کرانے والا ہے۔ اس فیچر کے تحت سرچ نتائج میں صارفین کو انگریزی زبان میں AI کی مدد سے تیار شدہ اشتہارات دکھائے جائیں گے۔

یہ نیا فیچر گوگل کے "AI Overviews" پروگرام کا حصہ ہے، جس میں سرچ کے آغاز میں صارفین کو فوری اور جامع معلومات فراہم کی جاتی ہیں۔ اب اس پروگرام میں اشتہارات بھی شامل کیے جا رہے ہیں تاکہ کاروباری ادارے اپنی مصنوعات اور خدمات کو زیادہ مؤثر طریقے سے صارفین تک پہنچا سکیں۔

گوگل کا کہنا ہے کہ اس اقدام سے پاکستانی کاروباروں کو اپنی شناخت بہتر بنانے اور مخصوص صارفین تک پہنچنے میں مدد ملے گی، جبکہ صارفین بھی اپنی تلاش سے متعلق زیادہ درست اور مناسب اشتہارات دیکھ سکیں گے، جس سے ان کے فیصلے آسان اور فوری ہوں گے۔

یہ پیش رفت پاکستان میں گوگل کی مصنوعی ذہانت اور ڈیجیٹل ترقی کے لیے کوششوں کا تسلسل ہے۔ گوگل نے حال ہی میں ملک میں "AI Academy" کا آغاز بھی کیا ہے، جس کا مقصد مقامی اسٹارٹ اپس کو تربیت، رہنمائی اور وسائل فراہم کرنا ہے تاکہ مصنوعی ذہانت کے شعبے میں جدت اور ترقی کو فروغ دیا جا سکے۔