مشرقِ وسطیٰ میں کشیدگی: اسحاق ڈار اور کویتی وزیر خارجہ کا رابطہ، عالمی معیشت کو لاحق خطرات پر غور

اسلام آباد:نائب وزیراعظم و وزیر خارجہ سینیٹر اسحاق ڈار اور کویت کے وزیر خارجہ شیخ جراح جابر الاحمد الصباح کے درمیان اہم ٹیلی فونک رابطہ ہوا ہے۔ اس رابطے کے دوران دونوں رہنماؤں نے خطے میں تیزی سے بدلتی ہوئی صورتحال اور اس کے عالمی اثرات پر گہری تشویش کا اظہار کیا۔
رابطے کا بنیادی محور مشرقِ وسطیٰ کی موجودہ کشیدگی اور آبنائے ہرمز کی ممکنہ بندش رہی۔ دونوں وزرائے خارجہ نے اس بات پر اتفاق کیا کہ اس اہم تجارتی راستے کی بندش عالمی معیشت کے لیے ایک بڑا بحران پیدا کر سکتی ہے، جس سے توانائی کی ترسیل اور بین الاقوامی تجارت شدید متاثر ہونے کا خدشہ ہے۔
کویتی وزیر خارجہ نے گفتگو کے دوران پاکستان کی جانب سے کی جانے والی امن کوششوں کو زبردست خراجِ تحسین پیش کیا۔ انہوں نے وزیراعظم پاکستان، فیلڈ مارشل اور نائب وزیراعظم اسحاق ڈار کے تعمیری کردار کو سراہتے ہوئے کہا کہ پاکستان خطے میں استحکام کے لیے کلیدی کردار ادا کر رہا ہے۔
دونوں رہنماؤں نے علاقائی سلامتی کو یقینی بنانے کے لیے باہمی تعاون بڑھانے اور سفارتی کوششیں جاری رکھنے پر اتفاق کیا۔ اسحاق ڈار نے واضح کیا کہ پاکستان خطے میں کسی بھی قسم کے تنازعے کے بجائے مذاکرات اور امن کا حامی ہے تاکہ عالمی معیشت اور انسانی فلاح کو کوئی نقصان نہ پہنچے۔