پاک ترک دفاعی شراکت داری: پی این ایس خیبر کی 'ترگت رئیس 8' مشقوں میں بھرپور شرکت

راولپنڈی : پاک بحریہ کے جنگی جہاز 'پی این ایس خیبر' نے ترکیہ کی اکساز نیول بیس کا اہم دورہ کیا ہے، جہاں ترک بحریہ کے ساتھ مشترکہ بحری مشق 'ترگت رئیس 8' (Turgutreis-VIII) کا انعقاد کیا گیا۔ پاک فوج کے شعبہ تعلقات عامہ (ISPR) کے مطابق، یہ دورہ دونوں برادر ممالک کے درمیان بحری تعاون اور دفاعی سفارت کاری کو مزید مستحکم کرنے کی کڑی ہے۔
مشقوں کے دوران دونوں ممالک کی بحری افواج نے سمندر میں پیچیدہ آپریشنل مشقیں کیں جن کا مقصد حربی تال میل اور مشترکہ کارروائیوں کی صلاحیت کو نکھارنا تھا۔ سمندری حدود میں سیکیورٹی چیلنجز سے نمٹنے کے لیے باہمی تعاون کو فروغ دیا گیا۔
پی این ایس خیبر اور ترک بحریہ کے جہازوں نے مختلف مشقوں کے ذریعے اپنی پیشہ ورانہ مہارتوں کا تبادلہ کیا۔دورے کے دوران پی این ایس خیبر کے کمانڈنگ آفیسر نے ترک سدرن سی ایریا کمانڈر سے ملاقات کی، جس میں درج ذیل نکات زیرِ بحث آئے۔ خطے میں امن و امان کی مجموعی صورتحال اور سمندری تجارت کے تحفظ پر تبادلہ خیال۔مستقبل میں بحری شعبے میں تعاون کو مزید وسعت دینے پر اتفاق۔
    ترک بحریہ کے اعلیٰ حکام نے پی این ایس خیبر کا معائنہ کیا اور پاکستانی عملے کی پیشہ ورانہ صلاحیتوں کو سراہتے ہوئے اسے پاک ترک دوستی کی علامت قرار دیا۔