15 سال سے کم عمر بچوں کے سوشل میڈیا استعمال کرنے پر پابندی

پیرس : فرانس میں ایک پارلیمانی کمیٹی نے بچوں اور نوجوانوں پر سوشل میڈیا کے منفی اثرات کا جائزہ لینے کے بعد سفارش کی ہے کہ 15 سال سے کم عمر بچوں کو سوشل میڈیا استعمال کرنے سے مکمل روکا جائے۔ اس کے علاوہ، 15 سے 18 سال کے نوجوانوں کے لیے رات 10 بجے سے صبح 8 بجے تک سوشل میڈیا استعمال کرنے پر پابندی لگانے کا بھی مشورہ دیا گیا ہے۔

یہ کمیٹی مارچ 2025 میں اس وقت بنی جب کچھ خاندانوں نے ٹک ٹاک پر مقدمہ دائر کیا تھا کہ ان کے بچوں کو ایسا نقصان دہ مواد دکھایا گیا جو انہیں خودکشی کی طرف لے گیا۔ ٹک ٹاک کا کہنا ہے کہ وہ بچوں کی حفاظت کو اہمیت دیتا ہے اور نقصان دہ مواد کو جلد ہٹاتا ہے۔

کمیٹی نے یہ بھی کہا ہے کہ اگر تین سال کے اندر سوشل میڈیا کمپنیاں یورپی قوانین کی پابندی نہ کریں تو 18 سال سے کم عمر افراد کے لیے سوشل میڈیا پر مکمل پابندی لگائی جائے گی۔ ساتھ ہی والدین کی ذمہ داری کو قانونی حیثیت دی جائے گی اور عمر کی تصدیق کا نظام لازمی قرار دیا جائے گا۔

فرانس اور دیگر یورپی ممالک بچوں کی آن لائن سرگرمیوں کو کنٹرول کرنے کے لیے سخت قوانین چاہتے ہیں، لیکن اس پر بحث بھی جاری ہے کہ یہ پابندیاں بچوں کی حفاظت کریں گی یا ان کی آزادی محدود کر دیں گی۔