میٹا کا نیا فیچر: ریلز ویڈیوز کی زبان تبدیل کریں اور ڈب کریں

کیلیفورنیا : میٹا نے فیس بک اور انسٹاگرام پر ریلز ویڈیوز کو آپ کی زبان میں ڈب اور ٹرانسلیٹ کرنے کا نیا فیچر متعارف کرایا ہے۔ اب آپ کسی بھی ویڈیو کو جو کسی دوسری زبان میں بنی ہو، اپنی پسندیدہ زبان میں دیکھ سکتے ہیں۔

اس فیچر میں میٹا اے آئی کی مدد سے ریلز ویڈیوز کو انگلیش، ہندی، اسپینش اور پرتگیز میں ٹرانسلیٹ کیا جا سکتا ہے۔ مثال کے طور پر، اگر آپ برازیل میں بنائی گئی کسی کھانے کی ویڈیو دیکھ رہے ہیں، تو آپ اسے اپنی زبان میں سن سکتے ہیں، یا کسی گانے کے بول کو بھی اپنی زبان میں ٹرانسلیٹ کر سکتے ہیں۔ میٹا کا اے آئی ویڈیو کے تخلیق کار کے ہونٹوں کی حرکت کے ساتھ مطابقت بھی کرے گا تاکہ ویڈیو زیادہ حقیقت پسندانہ لگے۔

یہ فیچر فی الحال انسٹاگرام کے پبلک اکاؤنٹس اور فیس بک پر صارفین کے لیے دستیاب ہے، تاہم فیس بک پر اسے استعمال کرنے کے لیے آپ کو کم از کم ایک ہزار فالوورز کی ضرورت ہوگی۔

میٹا کا کہنا ہے کہ اس فیچر کا مقصد ویڈیوز کو زیادہ لوگوں تک پہنچانا اور انہیں مختلف زبانوں میں قابل رسائی بنانا ہے تاکہ لوگ دنیا بھر کے مواد سے لطف اندوز ہو سکیں۔ ویڈیوز کے ترجمے پر میٹا اے آئی کا لیبل ظاہر ہوگا، لیکن صارفین اس کو آف بھی کر سکتے ہیں یا اپنی پسندیدہ زبان میں ویڈیو دیکھنے کا انتخاب کر سکتے ہیں۔

یہ پہلا موقع نہیں جب میٹا نے زبان کی رکاوٹوں کو ختم کرنے کے لیے ایسے ٹولز فراہم کیے ہوں۔ اس سے پہلے بھی آٹو کیپشنز اور سب ٹائٹل اسٹوریز جیسے فیچرز موجود ہیں، مگر یہ پہلی بار ہے کہ میٹا نے اے آئی کی مدد سے ویڈیوز کو ڈب اور lip-sync کرنے کا اتنا جدید طریقہ متعارف کرایا ہے۔