سرکاری حج اسکیم کا دوسرا مرحلہ شروع، غیر رجسٹرڈ افراد بھی درخواست دے سکتے ہیں

اسلام آباد : سرکاری حج اسکیم کے تحت حج پر جانے کے خواہشمند افراد کے لیے خوشخبری ہے۔ حکومت نے درخواستوں کا دوسرا مرحلہ شروع کر دیا ہے، اور اب وہ افراد بھی درخواست دے سکتے ہیں جو پہلے رجسٹر نہیں ہو سکے تھے۔

حکام کے مطابق، سرکاری اسکیم کے تحت ابھی تک صرف 60 فیصد کے قریب درخواستیں موصول ہوئی ہیں، جب کہ تقریباً 40 فیصد حج کوٹہ ابھی بھی خالی ہے۔ اب تک 71 ہزار سے زائد افراد نے اپنی درخواستیں بینکوں میں جمع کروائی ہیں، تاہم ایک لاکھ 18 ہزار کے مجموعی کوٹے میں سے تقریباً 47 ہزار نشستیں باقی ہیں۔

درخواستیں جمع کرانے کی آخری تاریخ 16 اگست ہے، اور حج اخراجات کی پہلی قسط کے ساتھ درخواست دینا ضروری ہے۔ طویل حج کے لیے پہلی قسط 5 لاکھ روپے جبکہ مختصر حج کے لیے ساڑھے 5 لاکھ روپے رکھی گئی ہے۔

بیرون ملک مقیم پاکستانی بھی اپنے قریبی رشتہ داروں کے ذریعے پاکستان میں حج درخواست جمع کرا سکتے ہیں، لیکن واپسی پر انہیں میڈیکل فٹنس سرٹیفکیٹ جمع کرانا ہوگا۔

حکومت نے واضح کیا ہے کہ جیسے ہی کوٹہ مکمل ہو گیا، درخواستیں لینا بند کر دی جائیں گی، اس لیے دلچسپی رکھنے والے افراد کو جلد از جلد اپنی درخواستیں جمع کرانے کی ہدایت کی گئی ہے۔