جنوبی فلپائن میں زبردست زلزلہ، سونامی کی وارننگ، لوگ محفوظ جگہوں پر منتقل

منیلا : جنوبی فلپائن کے ساحل کے قریب 7.6 شدت کا زلزلہ آیا ہے جس کے باعث شدید خوف و ہراس پھیل گیا ہے۔ فلپائن کے زلزلہ پیما ادارے نے سونامی کی وارننگ جاری کرتے ہوئے قریبی ساحلی علاقوں کے لوگوں کو فوری طور پر اونچی جگہوں پر جانے کا کہا ہے۔

زلزلے کے جھٹکے منڈاناؤ کے دارالحکومت ڈیوس میں بھی محسوس کیے گئے، جہاں لوگ گھروں اور دکانوں سے باہر نکل کر کھلے میدانوں میں جمع ہو گئے۔ سکول بند کر دیے گئے اور ہسپتالوں نے بھی مریضوں کو محفوظ جگہوں پر منتقل کیا۔

زلزلہ سمندر کی گہرائی 10 کلومیٹر پر آیا اور منڈاناؤ کے ساحل کے نزدیک واقع ہے۔ انسٹی ٹیوٹ آف وولکینولوجی اینڈ سیسمولوجی کے مطابق سونامی کی لہریں ایک میٹر یا اس سے زیادہ اونچی ہو سکتی ہیں، خاص طور پر بند خلیجوں اور تنگ پانی کے راستوں میں۔

صدر فرڈیننڈ مارکوس جونیئر نے متاثرہ ساحلی علاقوں میں فوری انخلاء کا حکم دیا ہے اور عوام سے اپیل کی ہے کہ وہ حکومتی ہدایات تک ساحل سے دور رہیں۔ انہوں نے یقین دلایا کہ امدادی ٹیمیں جلد سے جلد متاثرہ علاقوں میں پہنچ کر مدد فراہم کریں گی۔

یہ زلزلہ ایسے وقت آیا ہے جب فلپائن پہلے ہی قدرتی آفات کے گہرے بحران کا شکار ہے۔ گزشتہ ہفتے سیبو کے ساحلی شہر بوگو میں 7.0 شدت کا زلزلہ ہوا تھا جس میں 74 افراد ہلاک اور 500 سے زائد زخمی ہوئے تھے۔ ساتھ ہی حالیہ طوفانوں نے بھی ملک کے مختلف حصوں کو بری طرح متاثر کیا ہے۔فلپائن زلزلے اور دیگر قدرتی آفات کے حوالے سے دنیا کے حساس ترین خطوں میں شمار ہوتا ہے، جہاں اکثر زلزلے آتے رہتے ہیں۔