سہ ملکی سیریز کے لیے لاہور اور راولپنڈی میں میچز کیلئے فوج، رینجرز طلب

لاہور : پنجاب حکومت نے پاکستان، سری لنکا اور زمبابوے کے درمیان ہونے والی کرکٹ سیریز کے دوران سکیورٹی کے فول پروف انتظامات تیار کر لیے ہیں۔ محکمہ داخلہ پنجاب کے مطابق، لاہور اور راولپنڈی میں سکیورٹی کی نگرانی کے لیے پاکستان آرمی، رینجرز اور ایوی ایشن فورسز کو تعینات کیا جائے گا۔

لاہور میں آرمی اور رینجرز کی ایک ایک کمپنی سکیورٹی کے فرائض سرانجام دے گی، جبکہ راولپنڈی میں تین تین کمپنیاں تعینات کی جائیں گی۔ لاہور میں سکیورٹی کے لیے آرمی کے ہیلی کاپٹر بھی استعمال کیے جائیں گے۔

محکمہ داخلہ کا کہنا ہے کہ سیریز کے دوران ٹیموں کے قیام، ٹریول روٹس اور میچز کے مقامات پر سکیورٹی کو سخت رکھا جائے گا۔ یہ تمام اقدامات آئین کے آرٹیکل 245 اور پاکستان رینجرز آرڈیننس 1959 کے تحت کیے جا رہے ہیں۔

سیریز کے میچز 11 سے 27 نومبر تک شیڈول ہیں، اور سکیورٹی انتظامات کے لیے فوج اور رینجرز کی خدمات 8 نومبر سے 30 نومبر تک درکار ہوں گی۔ حکومت کا کہنا ہے کہ اس سیریز کے دوران شائقین کرکٹ کو ایک محفوظ اور پرامن ماحول فراہم کرنا ان کی سب سے بڑی ترجیح ہے۔