بیجنگ: خطے میں جنگ کے بادل چھٹانے کے لیے پاکستان کی سفارتی کوششوں کو عالمی سطح پر بڑی پذیرائی ملنا شروع ہو گئی ہے۔ چین نے ایران کے خلاف ممکنہ جنگ روکنے کے لیے پاکستان کے اقدامات اور ثالثی کے کردار کی باضابطہ حمایت کا اعلان کر دیا ہے۔
چینی وزارتِ خارجہ نے اپنے حالیہ بیان میں واضح کیا ہے کہ چین پاکستان کی جانب سے جنگ بندی اور ثالثی کے لیے کی جانے والی کوششوں کا خیر مقدم کرتا ہے۔
بیجنگ خطے میں قیامِ امن کے لیے ہر اس قدم کی حمایت کرے گا جو کشیدگی کو کم کرنے میں معاون ثابت ہو۔ امید ہے کہ ایران اور امریکہ سمیت تمام متعلقہ فریقین امن کے اس موقع کو ضائع نہیں کریں گے۔برطانوی خبر رساں ایجنسی کی رپورٹ کے مطابق، پاکستان نے ایک اسٹریٹجک فریم ورک تیار کیا ہے جسے امریکہ اور ایران کے اعلیٰ حکام کے ساتھ شیئر کیا جا چکا ہے۔ اس فریم ورک کا مقصد درج ذیل ہے ۔ فریقین کو مذاکرات کی میز پر لانا۔ کسی بھی ممکنہ فوجی تصادم کے خطرے کو ٹالنا۔ خطے میں معاشی اور سیاسی استحکام کو یقینی بنانا۔
ماہرین کا کہنا ہے کہ چین کی جانب سے پاکستان کے امن اقدامات کی حمایت اس بات کا ثبوت ہے کہ بیجنگ خطے میں پاکستان کو ایک کلیدی 'امن کار' (Peace-maker) کے طور پر دیکھتا ہے۔ پاکستان کی یہ سفارتی پیشرفت تہران اور واشنگٹن کے درمیان بڑھتی ہوئی خلیج کو کم کرنے میں اہم سنگِ میل ثابت ہو سکتی ہے۔
NaiBaat | Copyright © 2026
