دفاعی تعاون کے فروغ پر پاکستان اور لبنان کے درمیان رابطے

بیروت: لبنانی فوج کے سربراہ ایک سرکاری دورے پر پاکستان کے لیے روانہ ہو گئے ہیں۔ خبر ایجنسی کے مطابق اس دورے کا بنیادی مقصد دونوں ممالک کے درمیان دفاعی تعاون، پیشہ ورانہ عسکری روابط اور باہمی دلچسپی کے امور پر تفصیلی تبادلہ خیال کرنا ہے۔

ذرائع کے مطابق دورہ پاکستان کے دوران لبنانی آرمی چیف اعلیٰ سطح کے عسکری اور حکومتی حکام سے ملاقاتیں کریں گے، جن میں خطے کی مجموعی سکیورٹی صورتحال، دفاعی تعاون کے فروغ اور فوجی تربیت کے شعبے میں اشتراک جیسے امور پر بات چیت متوقع ہے۔

خبر ایجنسی کا کہنا ہے کہ پاکستان اور لبنان کے درمیان عسکری تعلقات دوستانہ، مضبوط اور طویل عرصے سے قائم ہیں، جبکہ دونوں ممالک مختلف شعبوں میں تعاون کے دائرہ کار کو مزید وسعت دینے میں دلچسپی رکھتے ہیں۔

امکان ظاہر کیا جا رہا ہے کہ اس دورے کے دوران دوطرفہ تعلقات کو مزید مستحکم بنانے اور دفاعی شعبے میں تعاون بڑھانے کے حوالے سے اہم پیش رفت سامنے آ سکتی ہے۔